தண்டவாளத்தின் குறுக்கே சிக்கிய வாகனம்; சென்னை - போடி ரயில் நிறுத்தம்

மதுரை: மதுரை வடபழஞ்சி ரயில்வே ஸ்டேஷன் அருகே கான்கிரீட் வாகனத்தின் 'டிரெயிலர்' தண்டவாளத்தின் நடுவே சிக்கியதால் போடி செல்லும் எக்ஸ்பிரஸ் ரயில் 10 நிமிடம் நிறுத்தப்பட்டது. அசம்பாவிதம் ஏற்படும் முன் மாவட்ட நிர்வாகம் நடவடிக்கை எடுக்க அப்பகுதியினர் வலியுறுத்தினர். மதுரை காமராஜ் பல்கலை எதிரே வடபழஞ்சி மெயின் ரோட்டில், மதுரை - போடி ரயில்பாதை குறுக்கிடுகிறது. இங்கு ரயில்வே தரப்பில் சுரங்கப்பாதை அமைக்கும் பணி மேற்கொண்டபோது சிலரது எதிர்ப்பால் பாதியில் நிறுத்தப்பட்டது. 10 ஆண்டுகளாக பணி மேற்கொள்ளப்படாமல் கழிவுநீர் தேங்கி குப்பை கொட்டும் இடமாக மாறியுள்ளது. இதனால் அப்பகுதியினர் ஆபத்தான முறையில் தண்டவாளத்தை கடந்து செல்கின்றனர். பாதுகாப்பு கருதி அவ்வழியே செல்லும் ரயில்களும் 15 கி.மீ., வேகத்தில் மெதுவாக இயக்கப்பட்டு வருகின்றன. இதுகுறித்து தினமலர் நாளிதழில் செய்தி வெளியானது. இந்நிலையில் நேற்று காலை 7:00 மணிக்கு கான்கிரீட் வாகனம் ஒன்று டிரெயிலருடன் தண்டவாளத்தை கடக்க முயன்ற போது டிரெயிலரின் கால்கள் தண்டவாளத்தின் நடுவே உள்ள பள்ளத்தில் சிக்கியது. இதைக் கண்ட அப்பகுதியினர் டிரெயிலரை அப்புறப்படுத்தும் முயற்சியில் ஈடுபட்டனர். மழை காரணமாக சேறும் சகதியுமாக இருந்ததால் அகற்றுவதில் சிரமம் ஏற்பட்டது. அச்சமயம் சென்னை சென்ட்ரல் - போடி ரயில் மெதுவாக வந்த நிலையில், தண்டவாளத்தில் சிக்கிய வாகனத்தை கண்ட ஓட்டுநர் ரயிலை நிறுத்தினார். பின் டிரெயிலர் அகற்றப்பட்டு 10 நிமிடம் தாமதமாக ரயில் புறப்பட்டுச் சென்றது. இப்பகுதியில் ரயில்வே கேட் அமைக்க வேண்டும் அல்லது சுரங்கப்பாதை பணியை முடிக்க வேண்டும் என கிராமத்தினர் பல ஆண்டுகளாக கோரிக்கை விடுத்து வருகின்றனர். ரயில்வே தரப்பும் சுரங்கப்பாதை பணி மேற்கொள்ள தயாராக உள்ளது. விபத்து போன்ற அசம்பாவிதம் நடப்பதற்குள் மாவட்டம், பஞ்சாயத்து நிர்வாகம் எதிர்ப்பாளர்களுடன் பேசி பிரச்னைக்கு தீர்வு காண வேண்டும் என அப்பகுதியினர் வலியுறுத்தினர்.