அம்மா உணவகத்தில் இடிந்து விழுந்த கூரை: உணவகம் மூடல்

ராமநாதபுரம்: ராமநாதபுரம் அரசு மருத்துவக்கல்லுாரி மருத்துவமனையில் நகராட்சி கட்டுப்பாட்டில் உள்ள அம்மா உணவகம் பராமரிப்பின்றி நேற்று கட்டடத்தின் கூரை பெயர்ந்து விழுந்ததில் பணியாளர்கள் அதிர்ஷ்ட வசமாக தப்பினர். இதையடுத்து தற்காலிகமாக உணவகத்தை மூடினர்.ராமநாதபுரம் பஸ் ஸ்டாண்ட் அருகே அரசு மருத்துவக்கல்லுாரி மருத்துவமனை வளாகத்தில் அ.தி.மு.க., ஆட்சியில் அமைக்கப்பட்ட அம்மா உணவகம் பராமரிக்கப்படாமல் பெயரளவில் செயல்படுகிறது. இங்கு குறைந்த விலையில் உணவு விற்பனை செய்வதால் ஏராளமானோர் வருகின்றனர். நேற்று காலையில் 10:00 மணிக்கு உணவகத்தின் கட்டடம் கூரை பெயர்ந்து விழுந்தது. பணியாளர்கள் சமையல் அறை பக்கம் இருந்ததால் அதிர்ஷ்ட வசமாக தப்பினர். அ.தி.மு.க., ஆட்சியில் அம்மா உணவகம் அமைக்கப்பட்டதால் தி.மு.க., பிரதிநிதிகள் கண்டுகொள்ளவில்லை என்ற புகார் எழுந்துள்ளது.எழை மக்கள், தொழிலாளர்கள் பயன்பெறும் அம்மா உணவகம் கட்டடத்தை சீரமைத்து மேம்படுத்த அரசு நடவடிக்கை எடுக்க வேண்டும்.