பரமக்குடி கோயில்களில் மார்கழி உற்ஸவம் கோலாகலம்

பரமக்குடி: பரமக்குடி கோயில்களில் மார்கழி உற்ஸவம் கோலாகலமாக நடந்து வரும் நிலையில் டிச.23 கால பைரவ அஷ்டமி விழா நடக்கிறது. பரமக்குடி சுந்தரராஜ பெருமாள் கோயிலில் காலை 5:00 மணிக்கு திருப்பள்ளி எழுச்சி, திருப்பாவை பாடல்களை கோஷ்டியினர் பாடி வருகின்றனர். தினமும் காலை 5:45 மணிக்கு மூலவர் பரமஸ்வாமி, உற்ஸவர் சுந்தரராஜ பெருமாளுக்கு மகா தீபாராதனை நடந்து பிரசாதங்கள் வழங்கப்படுகிறது.அதே போல் ஈஸ்வரன் கோயிலில் காலை 4:00 மணிக்கு திருப்பள்ளி எழுச்சி, திருவெம்பாவை பாடல்கள் பாடப்படுகிறது. இங்கு விசாலாட்சி அம்பிகா, சந்திர சேகர சுவாமிக்கு டிச.23 அதிகாலை 4:00 மணிக்கு கால பைரவ அஷ்டமி மகா அபிஷேகம் நடக்கிறது.தொடர்ந்து அனைத்து ஜீவராசிகளுக்கும் படி அளந்த லீலையில் பஞ்சமூர்த்திகள் புஷ்ப சப்பரத்தில் வீதி வலம் வர உள்ளனர். இதே போல் மீனாட்சி சுந்தரேஸ்வரர் கோயிலிலும் அபிஷேகம் நிறைவடைந்து சுவாமி வீதி வலம் வருகிறார்.