சாலுாரில் காற்றால் சரிந்த கரும்பு

சிவகங்கை: சிவகங்கை அருகே சாலுார் பகுதியில் மழையுடன் காற்று வீசியதால் கரும்பு சாய்ந்தது. சிவகங்கை மாவட்டத்தில் பொங்கலுக்கு தேவையான கரும்பு சாலுார், கீழசாலுார், பெருமாள்பட்டி, கொளிஞ்சிபட்டி, மதகுபட்டி அருகேயுள்ள ஆலம்பட்டி உள்ளிட்ட கிராமங்களில் கிணற்று பாசனம் மூலம் பயிரிடப்பட்டுள்ளது. ஒவ்வொரு ஆண்டும் ஏப்ரல் - மே மாதங்களில் கரும்பு கட்டைகளை நடவு செய்து, தொடர்ந்து அவற்றிற்கு உரமிட்டும், மருந்து தெளித்தல், மண் அணைத்தல், களை யெடுப்பு என பல்வேறு பணிகளை செய்து, டிசம்பரில் இருந்து தை பொங்கலுக்காக அறுவடை செய்வர். தற்போது நடவு செய்து நன்கு விளைந்த கரும்பு அறுவடைக்கு தயாராகி வருகிறது. இக் கரும்பு மாவட்டத்தின் பிற பகுதிக்கும் வெளி மாவட்டங்களுக்கும் விற்பனைக்கு அனுப்பப்பட உள்ளன. இந்நிலையில் மாவட்டத்தில் கடந்த சில தினங்களாக மழை பெய்து வருகிறது. நேற்று திடீர் என காற்று வீசியதால் கரும்பு தோட்டத்தில் பயிரியிடப்பட்டுள்ள கரும்பு சாய்ந்தது. இந்த கரும்புகளை கயிறு கட்டிப் பிணைக்கும் பணியில் விவசாயிகள் ஈடுபட்டுள்ளனர்.