கல்வி மலர் – கட்டுரை –2 –––––––––––––––––––––––––– நாளைய படிப்புகள்... இன்று திறக்கும் கதவுகள்
“நீ என்ன படிக்கிறாய்?” என்ற கேள்விக்கு ஒரு காலத்தில் பொறியியல், மருத்துவம், வணிகவியல், கலை என்று சில பதில்களே இருந்தன. இன்று அதே கேள்வியைக் கேட்டால், “இப்படியெல்லாம் ஒரு படிப்பு இருக்கிறதா?” என்று ஆச்சரியப்படும் அளவுக்கு கல்வியின் உலகம் விரிவடைந்திருக்கிறது. உலகம் மாறும்போது வேலைகள் மட்டுமல்ல; அந்த வேலைகளுக்குத் தயாராகும் கல்வியும் மாறுகிறது. முன்பு தனித்தனியாக இருந்த பல அறிவுத் துறைகள் இன்று ஒன்றோடொன்று இணைகின்றன. தொழில்நுட்பம், அறிவியல், வடிவமைப்பு, மருத்துவம், சுற்றுச்சூழல் என பல உலகங்கள் ஒரே படிப்பில் சந்திக்கத் தொடங்கியுள்ளன. செயற்கை நுண்ணறிவு மற்றும் இயந்திரக் கற்றல் (Artificial Intelligence & Machine Learning) இதற்கு முக்கியமான உதாரணம். இயந்திரங்கள் எப்படிக் கற்றுக்கொள்கின்றன, தகவல்களை எப்படிப் புரிந்துகொள்கின்றன, அதன் அடிப்படையில் எப்படித் தீர்வுகளை உருவாக்குகின்றன என்பதைக் கற்றுக்கொடுக்கும் துறை இது. மருத்துவம் முதல் விண்வெளி வரை பல துறைகளில் இதன் பயன்பாடு அதிகரித்து வருகிறது. ரோபோட்டிக்ஸ் மற்றும் தானியங்கி அமைப்புகள் (Robotics & Automation), மனிதர்களுக்கு உதவும் இயந்திரங்களை உருவாக்குகின்றன. தொழிற்சாலைகள் மட்டுமல்லாமல், மருத்துவம், வேளாண்மை, பேரிடர் மீட்பு, விண்வெளி ஆய்வு என பல துறைகளிலும் ரோபோக்களின் பயன்பாடு விரிவடைந்து வருகிறது. மருத்துவத்தையும் பொறியியலையும் இணைக்கும் உயிரியல் பொறியியல் (Biomedical Engineering), செயற்கை உறுப்புகள், மருத்துவக் கருவிகள், உடல்நலக் கண்காணிப்பு சாதனங்கள் போன்றவற்றை உருவாக்குகிறது. அதேபோல் உயிரியல் தகவலியல் (Bioinformatics), உயிரியல் தகவல்களையும் கணினி அறிவியலையும் இணைத்து மரபணுத் தகவல்கள் போன்ற மிகப்பெரிய தரவுகளை ஆராய உதவுகிறது. தரமான தரவியல் தரவியல் (Data Science) என்பது வெறும் எண்ணிக்கைகளைப் பார்ப்பதல்ல. ஆயிரக்கணக்கான தகவல்களில் மறைந்திருக்கும் போக்குகளைக் கண்டுபிடித்து, அவற்றிலிருந்து பயனுள்ள முடிவுகளை உருவாக்குவது. நகரப் போக்குவரத்து முதல் மருத்துவம் வரை பல துறைகளில் இதன் பயன்பாடு அதிகரித்து வருகிறது. விளையாட்டு வடிவமைப்பு (Game Design), கதை, ஓவியம், இசை, நிரலாக்கம், உளவியல் என பல துறைகளை ஒன்றிணைக்கிறது. அசைவூட்டம் மற்றும் காட்சிப் பின்னணி விளைவுகள் (Animation & VFX) திரைப்படங்களைத் தாண்டி கல்வி, மருத்துவம், விளம்பரம், விளையாட்டுகள், மெய்நிகர் உலகங்கள் என பல துறைகளில் பயன்படுத்தப்படுகின்றன. சுற்றுச்சூழல் அறிவியலும் முக்கியத்துவம் பெறுகிறது. காற்று, நீர், மண், காடுகள், உயிரினங்கள், காலநிலை மாற்றம் போன்ற பிரச்சினைகளுக்குத் தீர்வு காணும் அறிவை இது வழங்குகிறது. நிலைத்த கட்டடக்கலை (Sustainable Architecture), கட்டிடங்களை அழகாக உருவாக்குவதோடு, ஆற்றல் சேமிப்பு, நீர் மேலாண்மை, சுற்றுச்சூழல் பாதுகாப்பு ஆகியவற்றையும் கருத்தில் கொள்கிறது. மின்னணுப் பாதுகாப்பியல் (Cybersecurity) இன்னொரு வேகமாக வளர்ந்து வரும் துறை. நமது வாழ்க்கை இணையத்துடன் இணைந்துவிட்ட நிலையில், தனிப்பட்ட தகவல்கள் முதல் நிறுவனங்களின் தரவுகள் வரை அனைத்தையும் பாதுகாப்பதற்கான அறிவு முக்கியமாகிறது. பெருகும் வாய்ப்புகள் இந்தப் புதிய படிப்புகள் சொல்லும் மிக முக்கியமான விஷயம் ஒன்று உள்ளது. ஒரு மாணவன் இனி ஒரே ஒரு துறைக்குள் தன்னை அடைத்துக்கொள்ள வேண்டிய அவசியமில்லை. கணினி அறிவியலுடன் வடிவமைப்பையும், உயிரியல் அறிவியலுடன் தரவியலையும், பொறியியலுடன் தொழில்முனைவையும் இணைத்துப் படிக்கும் வாய்ப்புகள் பெருகி வருகின்றன. ஏனென்றால் இன்றைய உலகின் பல பிரச்சினைகளுக்கு ஒரே துறையின் அறிவு மட்டும் போதுவதில்லை. பல துறைகளின் அறிவு சந்திக்கும் இடத்தில்தான் புதிய யோசனைகளும் புதிய தீர்வுகளும் உருவாகின்றன. அதனால், “நீ என்ன படிக்கப் போகிறாய்?” என்பதுடன், “நீ எந்தெந்த அறிவுத் துறைகளை இணைக்கப் போகிறாய்?” என்பதும் முக்கியமான கேள்வியாகிவிட்டது. நேற்றைய படிப்புகள் ஒரு தொழிலுக்கான கதவைத் திறந்தன. இன்றைய படிப்புகள் பல கதவுகளைத் திறக்கின்றன. நாளைய கதவுகளைத் திறக்கப் போவது இன்றைய மாணவர்களின் ஆர்வமும் கற்பனையும். பாக்ஸ் 1 புதிய படிப்புகள்... புதிய வாய்ப்புகள் செயற்கை நுண்ணறிவு — இயந்திரங்கள் கற்றுக்கொள்வதும், தகவல்களைப் புரிந்துகொள்வதும். ரோபோட்டிக்ஸ் — மனிதர்களுக்கு உதவும் தானியங்கி இயந்திரங்களை உருவாக்குவது. உயிரியல் பொறியியல் — மருத்துவமும் பொறியியலும் இணைந்து புதிய கருவிகளை உருவாக்குவது. தரவியல் — மிகப்பெரிய தகவல்களில் இருந்து பயனுள்ள முடிவுகளைக் கண்டுபிடிப்பது. விளையாட்டு வடிவமைப்பு — கதை, கலை, இசை, நிரலாக்கம் ஆகியவற்றை இணைத்து விளையாட்டு உலகங்களை உருவாக்குவது. சுற்றுச்சூழல் அறிவியல் — இயற்கையையும் பூமியின் வளங்களையும் பாதுகாப்பதற்கான தீர்வுகளைத் தேடுவது. மின்னணுப் பாதுகாப்பியல் — இணைய உலகில் தகவல்களையும் தரவுகளையும் பாதுகாப்பது. ஒரு முக்கிய மாற்றம்: நாளைய வேலைகளுக்கு ஒரு பாடத்தில் மட்டும் தேர்ச்சி பெற்றிருப்பது போதாமல் போகலாம். வெவ்வேறு துறைகளின் அறிவை இணைத்து சிந்திக்கும் திறனும் முக்கியமாகிறது. –– படிப்பைத் தேர்வு செய்வதற்கு முன்... ஒரு படிப்பு பிரபலமாக இருக்கிறதா என்பதை மட்டும் பார்க்காமல், அந்தப் படிப்பு நமக்கு என்ன கற்றுக்கொடுக்கிறது என்பதையும் மாணவர்கள் கவனிக்க வேண்டும். கேள்வி கேட்கும் ஆர்வம் இருக்கிறதா? பிரச்னைக்குத் தீர்வு காணும் திறன் வளருமா? புதிதாக ஒன்றை உருவாக்கும் வாய்ப்பு கிடைக்குமா? வேறு துறைகளுடன் இணைந்து கற்றுக்கொள்ள முடியுமா? எதிர்காலத்தில் அந்த அறிவை பல்வேறு வேலைகளில் பயன்படுத்த முடியுமா? படிப்பின் பெயர் முக்கியம்தான். ஆனால் அதைவிட முக்கியமானது, அந்தப் படிப்பு மாணவனுக்குள் உருவாக்கும் சிந்தனைத் திறன்.