திருப்பூர் : மாநகராட்சி நடுநிலைப் பள்ளிக்கு புதிய வகுப்பறைகள் கட்ட 36 லட்சம் ரூபாய் நிதி வழங்கிய தம்பதிக்கு பல தரப்பினரும் பாராட்டு தெரிவித்தனர்.திருப்பூர், எஸ்.வி., காலனியைச் சேர்ந்த பாபு - கார்த்திகா தம்பதி. இவர்கள் சோலார் பேனல் உற்பத்தி நிறுவனம் நடத்தி வருகின்றனர்.மாநகராட்சி, 20வது வார்டு, எஸ்.வி., காலனி, ராமசாமி - மாணிக்கம்மாள் மாநகராட்சி நடுநிலைப் பள்ளியில், நான்கு புதிய வகுப்பறைகள் கட்டப்படுகிறது.இப்பணி, 72 லட்சம் ரூபாய் மதிப்பீட்டில் நமக்கு நாமே திட்டத்தில் மேற்கொள்ளப்படவுள்ளது. இதற்காக பாபு - கார்த்திகா தம்பதியினர் தங்கள் பங்களிப்பாக, 36 லட்சம் ரூபாய் வழங்கினர். இதற்கான காசோலையை நேற்று மேயர் தினேஷ்குமாரிடம் அவர்கள் வழங்கினர். 2வது மண்டல குழு தலைவர் கோவிந்தராஜ், கவுன்சிலர் நாகராஜ் உள்ளிட்டோர் உடனிருந்தனர்.இந்த நிதியை வழங்கிய பாபுவின் தாத்தா ராமசாமி - மாணிக்கம்மாள் தம்பதியினர், ஏற்கனவே இப்பள்ளிக்கு, 20 சென்ட் நிலமும், ஐந்து வகுப்பறை கட்டி கொடுத்தது குறிப்பிடத்தக்கது. இவ்வாறு, தொடர்ந்து கல்வி சேவையாற்றி வரும் பாபுவின் குடும்பத்தை அனைவரும் பாராட்டினர்.
தன் குடும்பத்திற்காக மட்டுமல்லாமல் கல்விக்காகவும் தங்களை அர்ப்பணித்துக் கொண்ட இவர்கள் குடும்பம் இதே நல்ல எண்ணத்தோடும் நலத்துடனும் வளத்துடன் நீடூழி வாழ்கவே....
06-Sep-2024