47 ரயில் நிலையங்களில் தானியங்கி டிக்கெட் இயந்திரம்

சென்னை: சென்னை எழும்பூர், தாம்பரம் உட்பட, 47 ரயில் நிலையங்களில், 100 தானியங்கி டிக்கெட் இயந்திரங்கள் அமைக்கப்பட உள்ளன.ரயில் நிலையங்களில் கூட்ட நெரிசலை தவிர்க்கும் வகையில், தானியங்கி இயந்திரம் வாயிலாக முன்பதிவு இல்லாத டிக்கெட் பெறும் வசதி, சில ஆண்டுகளுக்கு முன் துவக்கப்பட்டது.கொரோனா பாதிப்பின் போது, இந்த சேவை முடங்கியது. இதற்கிடையே, புதிதாக, 47 ரயில் நிலையங்களில் தானியங்கி, 'டிக்கெட் மிஷின்'கள் நிறுவ, 'டெண்டர்' வெளியிடப்பட்டுள்ளது.இதுகுறித்து, தெற்கு ரயில்வே அதிகாரிகள் நேற்று கூறியதாவது: சென்னை கோட்டத்தில் - 34; மதுரை - 16 உட்பட, ஆறு கோட்டங்களில் ஏற்கனவே 100க்கும் மேற்பட்ட டிக்கெட் இயந்திரங்கள் அமைக்கப்பட்டு உள்ளன.அடுத்த கட்டமாக, மேலும் 47 ரயில் நிலையங்களில், 100 தானியங்கி டிக்கெட் இயந்திரங்கள் நிறுவ, இம்மாதம், 16ம் தேதி டெண்டர் வெளியிடப்பட்டுள்ளது. அதிகபட்சமாக தாம்பரம் - 6, எழும்பூர் - 4, பெரம்பூர் - 4, மாம்பலம் - 6, வேளச்சேரி - 5, கிண்டி - 5 தானியங்கி கருவிகள் நிறுவப்படும்.இது தவிர, திண்டிவனம், காஞ்சிபுரம், திருத்தணி, அரக்கோணம், பட்டாபிராம், மயிலாப்பூர், சேப்பாக்கம், சைதாப்பேட்டை, குரோம்பேட்டை, கும்மிடிப்பூண்டி, தரமணி, திருவொற்றியூர், அத்திப்பட்டு உள்ளிட்ட ரயில் நிலையங்களில் தேவைக்கு ஏற்றார் போல, ஒன்று முதல் மூன்று இயந்திரங்கள் வரை நிறுவப்படும். இவ்வாறு அவர்கள் கூறினர்.