கோவையில் குழப்பம்! பதிவானது 64.81 சதவீதமா; 71.17 சதவீதமா?

கோவை: கோவை மாவட்ட நிர்வாகம் வெளியிட்ட பட்டியலில், கோவை தொகுதியில், 13 லட்சத்து, 64 ஆயிரத்து, 975 வாக்காளர்களே ஓட்டளித்திருப்பதாக தெரிவிக்கப்பட்டுள்ளது. இது, 64.81 சதவீதம். 2019 தேர்தலை காட்டிலும், 0.95 சதவீதமே அதிகம். ஆனால், தேர்தல் ஆணைய இணைய தளத்தில் வெளியிட்ட பட்டியலில், 71.17 சதவீதம் என இருந்ததால், குழப்பம் நிலவுகிறது. இதுவே, சமூக வலைதளங்களில் பரவியதால், இதுதொடர்பாக தெளிவுபடுத்த வேண்டியது, தேர்தல் ஆணையத்தின் பொறுப்பு.கோவை லோக்சபா தொகுதியில், 21 லட்சத்து, 6 ஆயிரத்து, 124 வாக்காளர்கள் உள்ளனர். ஆண்கள் - 10 லட்சத்து, 41 ஆயிரத்து, 349; பெண்கள் - 10 லட்சத்து, 64 ஆயிரத்து, 394, மூன்றாம் பாலினத்தவர்கள் - 381. ராணுவ வீரர்கள் ஓட்டு - 376 தனி.இதில், 13 லட்சத்து, 64 ஆயிரத்து, 975 வாக்காளர்கள் நேற்று நடந்த தேர்தலில் ஓட்டளித்ததாக, மாவட்ட நிர்வாகம் வெளியிட்ட பட்டியலில் தெரிவிக்கப்பட்டுள்ளது. இது, 64.81 சதவீதம். 2019 தேர்தலில், 63.86 சதவீதம் பதிவாகியிருந்தது; அதை காட்டிலும், 0.95 சதவீதமே ஓட்டு அதிகரித்திருப்பதாக கூறுவது, நம்பத்தகுந்ததாக இல்லை.

இணையதளத்தில் பொய்யா?

ஏனெனில், தேர்தல் ஆணைய இணைய தளத்தில் வெளியிட்ட பட்டியலில், கோவையில், 71.17 சதவீதம் என கூறப்பட்டுள்ளது. இதுவே, சமூக வலைதளங்களில் வைரலாக பரவி வருகிறது.2014 தேர்தலை காட்டிலும், 2019 தேர்தலில், 4.54 சதவீதம் குறைந்திருந்தது. அதனால், இம்முறை தேர்தல் ஆணையம் மூலம் பல்வேறு விழிப்புணர்வு நிகழ்ச்சிகள் நடத்தப்பட்டன.இதனால் படித்தவர்கள், முதல்முறை வாக்காளர்கள் மற்றும் இளைஞர்கள், இளம்பெண்கள் பலரும் ஓட்டுச்சாவடிகளுக்கு ஆர்வத்தோடு வந்திருந்து, வரிசையில் காத்திருந்து ஓட்டளித்தனர்.

படித்தவர்கள் ஓட்டு அதிகம்

காலை, 7:00 முதல் மதியம், 12:00 மணி வரை, இளைஞர்கள் பலரும் சாரை சாரையாக வந்து ஓட்டளித்தனர். படித்தவர்கள் பெரும்பாலும் ஓட்டளிக்க வராமல், வீட்டுக்குள் முடங்கி விடுவர் அல்லது சுற்றுலா கிளம்பி விடுவர்.இத்தேர்தலில் அதை தவிர்த்து, ஏராளமானோர், காலை, 7:00 - 11:00 மணிக்குள் ஓட்டளிக்க வந்ததை பார்க்க முடிந்தது. இதுபோன்ற காரணங்களால், கோவை லோக்சபா தொகுதியில் ஓட்டு சதவீதம் அபரிமிதமாக அதிகரித்திருக்கும் என எதிர்பார்க்கப்பட்டது. ஆனால், 13 லட்சத்து, 64 ஆயிரத்து, 975 வாக்காளர்களே ஓட்டளித்திருப்பதாக, மாவட்ட நிர்வாகம் வெளியிட்டுள்ள அறிக்கையில் கூறப்பட்டுள்ளது.2019 தேர்தலை காட்டிலும், வெறும், 0.95 சதவீதமே அதிகம். அதாவது, ஒரு லட்சத்து, 19 ஆயிரத்து, 331 வாக்காளர்களே அதிகமாக ஓட்டளித்திருக்கின்றனர். ஆனால், தேர்தல் ஆணையத்தின் இணைய தளம் வெளியிட்ட பட்டியலில், 71.17 சதவீதம் என கூறப்பட்டு இருந்தது. ஆகவே, கோவை லோக்சபா தொகுதியில் பதிவானது, 64.81 சதவீதமா அல்லது, 71.17 சதவீதமா என்கிற குழப்பம் நீடிக்கிறது. இந்த குழப்பத்தை தெளிவுபடுத்த வேண்டியது, தேர்தல் ஆணையத்தின் பொறுப்பு.

'எங்கிருந்து வந்ததென தெரியாது

கோவையில் பதிவான ஓட்டு சதவீதம் தொடர்பான குழப்பத்துக்கு, மாவட்ட தேர்தல் நடத்தும் அதிகாரியான, கலெக்டர் கிராந்திகுமாரிடம் கேட்டதற்கு, ''கோவை லோக்சபா தொகுதி ஓட்டு சதவீதம் - 64.81 என்பதே சரி. 71.17 சதவீதம் என குறிப்பிட்டு வரும் பட்டியல், எங்கிருந்து வந்தது என தெரியவில்லை. மாவட்ட நிர்வாகம் தரப்பில் தரவில்லை. 'டிரெண்டு' பார்த்து உத்தேச அடிப்படையில் கொடுத்தார்கள் என சொன்னார்கள். மாலை, 5:00 மணிக்கு ஒரு அறிக்கை தருவோம்; அதன்பின், ஓட்டுப்பதிவு முடிந்ததும் ஒரு அறிக்கை கொடுப்போம். வரிசையில் நிற்பவர்களுக்கு, டோக்கன் தருவோம். மாலை, 6:00 மணிக்கு ஒரு அறிக்கை கொடுத்து விட்டு, சதவீதத்தை அதிகரித்தால், ஓட்டு எங்கிருந்து வந்தது என கேட்கப்படும். மாலை, 5:00 மணிக்கு, 57.53 சதவீதம் இருந்தது. தற்போது, 64.81 சதவீதம் இருக்கிறது,'' என்றார்.