விவசாயிகளை பழிவாங்குகிறது தி.மு.க., அரசு: அன்புமணி காட்டம்

சென்னை: 'புயல் -மழையால், பாதிக்கப்பட்ட பயிர்களுக்கு, உடனே இழப்பீடு வழங்க வேண்டும்' என, பா.ம.க., தலைவர் அன்புமணி வலியுறுத்தி உள்ளார். அவரது அறிக்கை: 'டிட்வா' புயல் மழையால், காவிரி பாசன மாவட்டங்களில், 3 லட்சத்திற்கும் மேற்பட்ட ஏக்கரில், சம்பா மற்றும் தாளடி நெற்பயிர்கள், தண்ணீரில் மூழ்கியுள்ளன. விவசாயிகள் கவலையும், வேதனையும் அடைந்துள்ளனர். மழையில் பயிர்கள் சேதமடைவதால், பாதிக்கப்படும் விவசாயிகளுக்கு இழப்பீடு வழங்குவதில், தி.மு.க., அரசு அடுத்தடுத்து செய்து வரும் துரோகங்கள் கண்டிக்கத்தக்கவை. கடந்த நான்கரை ஆண்டுகளில், பல முறை மழையால், விவசாயிகள் பாதிக்கப்பட்டும், ஒரு முறை கூட, அவர்களுக்கு இழப்பீடு வழங்கவில்லை. அந்த அளவுக்கு விவசாயிகளை, தி.மு.க., அரசு பழிவாங்கி வருகிறது. கடந்த ஆண்டுகளில், விவசாயிகளை ஏமாற்றிய தி.மு.க., அரசு, மீண்டும் துரோகம் செய்யக் கூடாது. காவிரி பாசன விவசாயிகள், பெரும் கடன் சுமைக்கு ஆளாகி உள்ளனர். தற்போது, 'டிட்வா' புயல் - மழையால் பாதிக்கப்பட்ட பயிர்களுக்கு, உடனே இழப்பீடு வழங்க, அரசு நடவடிக்கை எடுக்க வேண்டும். இவ்வாறு அதில் கூறப்பட்டுள்ளது. முதல்வருக்கு கடிதம் ஆந்திர முதல்வர் சந்திரபாபு நாயுடுவுக்கு, அன்புமணி எழுதிய கடிதத்தில், 'ஆந்திர மாநிலம், காக்கிநாடா மாவட்டத்தில் உள்ள, பெரும்பான்மை மக்களின் விருப்பத்தை நிறைவேற்றும் வகையில், அம்மாவட்டத்திற்கு மறைந்த கல்வி வள்ளல், மல்லாடி சத்யலிங்க நாயக்கரின் பெயரை சூட்ட வேண்டும். 'ஆந்திராவில், கல்வி மற்றும் வேலை வாய்ப்பில், மிகவும் பின்தங்கிய நிலையில் உள்ள வன்னியகுல சத்திரியர், அக்கினிகுல சத்திரியர் சமூகங்களுக்கு, 6 சதவீதம் தனி இட ஒதுக்கீடு வழங்க வேண்டும்,' என கேட்டுக் கொண்டுள்ளார்.