தாயுமானவர் திட்டத்தில் மாற்றுத்திறனாளிகளுக்கு உணவு பொருட்கள் வழங்காமல் அலைக்கழிப்பு

சென்னை: தாயுமானவர் திட்டத்தின் கீழ், மாற்றுதிறனாளிகளின் வீடுகளுக்கு ரேஷன் பொருட்கள் வழங்காமல், உணவு துறையினர் அலைக்கழித்து வருவதாக புகார் எழுந்துள்ளது. தமிழகத்தில், 37,328 ரேஷன் கடைகள் உள்ளன. இங்கு பொருட்கள் வாங்கும் முதியோர் மற்றும் மாற்றுதிறனாளிகள், கடைகளுக்கு வந்து செல்ல சிரமப்படுகின்றனர். எனவே, 70 வயதுக்கு மேற்பட்ட முதியோர் மற்றும் மாற்றுதிறனாளிகளின் வீடுகளுக்கு, ரேஷன் பொருட்களை நேரடியாக வினியோகம் செய்ய, 'முதல்வரின் தாயுமானவர் திட்டம்' தமிழக அரசால் துவக்கப்பட்டது. இந்த திட்டத்தை, ஆக., 12ம் தேதி, முதல்வர் ஸ்டா லின் துவக்கி வைத்தார். இதன் வாயிலாக, 20.4 லட்சம் முதியோர் மற்றும், 1.27 லட்சம் மாற்றுத் திறனாளிகள் பயன் பெறுவர் என்று அறிவிக்கப் பட்டது. அதன்படி, மாதந்தோறும் இரண்டாவது சனி மற்றும் ஞாயிற்றுக்கிழமைகளில், வாகனங்கள் வாயிலாக ரேஷன் பொருட்கள் சப்ளை செய்யப்படுகின்றன. இதற்காக 30.10 கோடி ரூபாயை கூடுதலாக செலவு செய்ய உள்ளதாக, உணவுத்துறை அறிவித்துள்ளது. ஆனால், பல மாற்றுத்திறனாளிகளுக்கு, தாயு மானவர் திட்டத்தின் கீழ் ரேஷன் பொருட்கள் வழங்கப்படுவதில்லை என்ற குற்றச்சாட்டு எழுந்துள்ளது. இது குறித்து திருவள்ளூர் மாவட்ட மாற்றுத்திறனாளிகள் சங்க நிர்வாகிகள் சிலர் கூறியதாவது: இந்த திட்டம் துவக்கப்பட்டு நான்கு மாதங்களாகிறது. ஆனால், திருவள்ளூர் மாவட்டத்தில் பல மாற்றுத்திறனாளிகளுக்கு, திட்டத்தின் பயன் கிடைக்கவில்லை. ரேஷன் ஊழியர்களிடம் கேட்டால், மாற்றுத்திறனாளிகள் நலத்துறை வழங்கிய அடையாள சான்றை, மண்டல உணவுப் பொருள் வழங்கல் அலுவலர் அலுவலகத்தில் ஒப்படைத்து, ஒப்புதல் பெற வேண்டும் என்கின்றனர். மண்டல அலுவலகம் சென்றால் அவர்கள் அலைய விடுகின்றனர். மாற்றுத்திறனாளிகள் என்று தெரிந்தும், சான்றிதழ் கேட்டு உணவுத்துறையினர் அலைக்கழிப்பது வேதனை அளிக்கிறது. இதனால், அரசின் திட்டம் முழுமையாக மாற்றுத் திறனாளிகளை சென்று சேரவில்லை. முதல்வர் தலையிட்டு, சான்றிதழ் கேட்காமல் மாற்றுத்திறனாளிகளுக்கு நேரடியாக வீட்டிற்கு உணவு பொருட்கள் வழங்க உத்தரவிட வேண்டும். இவ்வாறு அவர்கள் கூறினர்.