எளிய முறையில் பதவியேற்பு விழா; கடும் குளிர் காரணமாக உள் அரங்கத்தில் நடக்கும் என டிரம்ப் அறிவிப்பு

வாஷிங்டன்: கடும் குளிர் காரணமாக, பதவியேற்பு விழா, வரும் ஜனவரி 20ம் தேதி 3 மணிக்கு உள் அரங்கத்தில் நடக்கிறது என அமெரிக்கா அதிபர் (தேர்வு) டொனால்டு டிரம்ப் தெரிவித்தார். அமெரிக்கா அதிபர் தேர்தலில், டொனால்டு டிரம்ப் அபார வெற்றி பெற்றார். அவர் வரும் ஜனவரி 20ம் தேதி அதிபராக பதவியேற்க உள்ளார். இதற்கான அனைத்து ஏற்பாடுகளும் சிறப்பாக நடந்து வருகிறது. இந்திய அரசு சார்பில், மத்திய வெளியுறவுத்துறை அமைச்சர் ஜெய்சங்கர் பங்கேற்க உள்ளார்.இந்நிலையில், பதவியேற்பு விழா குறித்து, டொனால்டு டிரம்ப் வெளியிட்டுள்ள அறிக்கை: ஜனவரி 20ம் தேதி அவ்வளவு வேகமாக வர முடியாது. ஆரம்பத்தில் என்னையும், எனது நிர்வாகத்தையும் எதிர்த்தவர்கள் கூட, தற்போது பதவியேற்பு விழா எப்போது நடக்கும் என்று விரும்புகிறார்கள். நம் நாட்டு மக்களைப் பாதுகாப்பது எனது கடமையாகும். வானிலை முன்னறிவிப்பை கருத்தில் கொண்டு, பதவியேற்பு விழா, வரும் ஜனவரி 20ம் தேதி மதியம் 3 மணிக்கு (அமெரிக்க நேரப்படி) உள் அரங்கத்தில் நடக்கிறது. எந்த வகையிலும் மக்கள் காயப்படுவதை நான் பார்க்க விரும்பவில்லை. பல்லாயிரக்கணக்கான சட்ட அமலாக்கப் பிரிவினர், போலீசார் மற்றும் குதிரைகள் மற்றும் ஆயிரக்கணக்கான ஆதரவாளர்கள் ஜனவரி 20ம் தேதி பல மணி நேரம் வெளியில் இருப்பது ஆபத்தான நிலைமையாகும்.எந்தவொரு நிகழ்விலும், நீங்கள் வர முடிவு செய்தால், பாதுகாப்பு ஆடைகளை அணியுங்கள்.மிகவும் குளிரான காலநிலை காரணமாக பதவியேற்பு உரையை உள் அரங்கத்தில் நடத்த உத்தரவிட்டு உள்ளேன். பல்வேறு உயரதிகாரிகள் மற்றும் விருந்தினர்கள் அரங்கிற்கு அழைத்து வரப்படுவார்கள். இது அனைவருக்கும் மிகவும் அழகான அனுபவமாக இருக்கும். இந்த வரலாற்று நிகழ்வை தொலைக்காட்சியில் நேரலையாகக் காண, அனைத்து ஏற்பாடுகளும் செய்யப்பட்டு உள்ளன. பிற்பகல் 3 மணிக்கு கேபிடல் அரங்கில் வெற்றிப் பேரணி நடைபெறும். பிற்பகல் 1 மணிக்கு அரங்கில் கதவுகள் திறக்கப்படும். தயவுசெய்து சீக்கிரம் வர வேண்டும். எல்லோரும் பாதுகாப்பாக இருப்பார்கள், அனைவரும் மகிழ்ச்சியாக இருப்பார்கள், நாங்கள் ஒன்றாக சேர்ந்து, மீண்டும் அமெரிக்காவை சிறந்ததாக மாற்றுவோம். இவ்வாறு டிரம்ப் கூறியுள்ளார்.