நீண்ட தூரம் சென்று தாக்கும் ஆயுதங்கள் வேண்டும் : அமெரிக்காவிடம் கேட்கிறார் உக்ரைன் அதிபர்

கீவ்: ' நீண்ட தூரம் சென்று தாக்கும் ஆயுதங்களை எங்களுக்கு வழங்க வேண்டும்,'' என்று அமெரிக்க அதிபரிடம் உக்ரைன் அதிபர் ஜெலன்ஸ்கி வலியுறுத்தி உள்ளார்.இது தொடர்பாக ஜெலன்ஸ்கி கூறியதாவது: ரஷ்யா போரை நிறுத்தாவிட்டால், உக்ரைன் தாக்குதல்களுக்கு கிரெம்ளின் சட்டபூர்வமான இலக்காக மாறக்கூடும். ரஷ்யாவின் வெடிகுண்டு முகாம்களை கண்டுபிடிக்க வேண்டும். அவர்களுக்கு அது தேவை. அவர்கள் போரை நிறுத்தவில்லை என்றால், எப்படியும் அவர்களுக்கு அது தேவைப்படும். நாங்கள் ஒவ்வொரு நாளும் பதிலடி கொடுப்போம் என்பதை அவர்கள் அறிந்து கொள்ள வேண்டும். அவர்கள் எங்களைத் தாக்கினால், நாங்கள் அவர்களுக்கு பதிலடி கொடுப்போம். அமெரிக்கா அதிக நீண்ட தூரம் சென்று தாக்கும் ஆயுதங்களை எங்களுக்கு வழங்க வேண்டும். எங்களுக்கு அது தேவை.ஆனால் நாங்கள் அதைப் பயன்படுத்துவோம் என்று அர்த்தமல்ல. ஏனென்றால் நமக்கு அது கிடைத்தால், புடினுக்கு போர் நிறுத்த பேச்சுவார்த்தை நடத்த அழுத்தம் உருவாகும் என்று நான் நினைக்கிறேன். நாங்கள் பயங்கரவாதிகள் அல்ல. உக்ரைன் பொதுமக்களை குறிவைக்காது. இவ்வாறு ஜெலன்ஸ்கி கூறினார்.ரஷ்ய அதிபர் புடினுடன் போர் நிறுத்த பேச்சுவார்த்தை நடத்தும் ஒவ்வொரு முயற்சியும் தோல்வியடைந்ததை அடுத்து, டிரம்ப் உக்ரைனுக்கு தனது ஆதரவைத் தெரிவித்துள்ளார் என்பது குறிப்பிடத்தக்கது.

இது சாத்தியமற்றது!

இதற்கிடையே, ஐக்கிய நாடுகள் சபையின் பொதுச் சபையில் ஜெலன்ஸ்கி பேசியதாவது: வரலாற்றில் மிகவும் அழிவுகரமான ஆயுதப் போட்டியில் நாம் இப்போது வாழ்ந்து வருகிறோம். புடின் இந்த போரை விரிவுபடுத்துவதன் மூலம் தொடர விரும்புகிறார். ரஷ்யா உக்ரைனைத் தொடர்ந்து தாக்குவதால் போர் நிறுத்தம் சாத்தியமற்றது, என்றார்.