அருப்புக்கோட்டை அரசு மருத்துவமனையில் எக்ஸ்ரே பிரிவில் டெக்னீசியனாக பணிபுரிபவர் ராஜ் (38). வழக்கம்போல் எக்ஸ்ரே அறையை சுத்தம் செய்ய துப்புரவு பணியாளர் உமா வந்தார். செருப்பு அணிந்தபடி அவர் உள்ளே வந்ததால், டெக்னீஷியன் ராஜ் திட்டியுள்ளார். இதனால், அவர்களுக்கு வாக்குவாதம் ஏற்பட்டு உள்ளது. ஒரு கட்டத்தில் ஆத்திரமடைந்த ராஜ், தாம் அணிந்திருந்த செருப்பை கழற்றி, உமாவை அடித்துள்ளார். அழுதுகொண்டே வெளியே வந்த உமா, சக துப்புரவு பணியாளர்களிடம் கூறினார். அனைவரும் சேர்ந்து போராட்டத்தில் ஈடுபட்டனர். மாவட்ட மருத்துவ இணை இயக்குநர் பாபுஜி விசாரித்தார். உமாவை அடித்ததற்கு மன்னிப்பு கேட்பதாக ராஜ் கூறியுள்ளார். மன்னிப்பு கேட்க ராஜ் வந்தபோது, அவரை 30க்கு மேற்பட்ட துப்புரவு பணியாளர்கள் சேர்ந்து தாக்கினர். மருத்துவமனை அலுவலர்கள் ராஜை மீட்டு அழைத்து சென்றனர். இதையடுத்து, எக்ஸ்ரே டெக்னீஷியன் ராஜ், காரியாபட்டி அரசு மருத்துவமனைக்கு மாற்றப்பட்டார்.