கெஜ்ரிவால் வசித்த பங்களாவின் வீடியோ வெளியிட்டது பாஜ | Ex CM Kejriwal | Luxury Bungalow issue | BJP | Aam Aadmi | Delhi 70 சட்டசபை தொகுதிகளை கொண்ட டில்லியில் வரும் பிப்ரவரியில் தேர்தல் நடக்க உள்ளது. இந்த தேர்தலில், ஆளும் ஆம் ஆத்மி - பா.ஜ., - காங்., இடையே மும்முனை போட்டி நிலவுகிறது. ஆம் ஆத்மி தேசிய ஒருங்கிணைப்பாளர் அரவிந்த் கெஜ்ரிவால், டில்லி முதல்வர் பதவியை செப்டம்பரில் ராஜினாமா செய்த பிறகு, புதிய முதல்வராக அக்கட்சி எம்.பி ஆதிஷி பதவியேற்றார். கெஜ்ரிவால் முதல்வராக இருந்தபோது, சிவில் லைன் பகுதியில் உள்ள அரசு பங்களாவில் வசித்தார். அப்போது அவர் 45 கோடி ரூபாய் செலவு செய்து பங்களாவில் புனரமைப்பு பணிகளை செய்ததாக, துவக்கத்தில் இருந்தே பா.ஜவினர் குற்றம்சாட்டி வருகின்றனர். சிபிஐயும் இதுகுறித்து விசாரிக்கிறது. சட்டசபை தேர்தலுக்கு இன்னும் இரு மாதங்களே உள்ள நிலையில், அரவிந்த் கெஜ்ரிவால் வசித்த சொகுசு பங்களா விவகாரம் தொடர்பாக, ஆளும் ஆம் ஆத்மி - பா.ஜ., இடையே மீண்டும் வார்த்தை மோதல் துவங்கி உள்ளது. சொகுசு பங்களாவில் உள்ள வசதிகள் தொடர்பான வீடியோவை, டில்லி பா.ஜ தலைவர் வீரேந்திர சச்தேவா சோசியல் மீடியாவில் நேற்று வெளியிட்டார். பங்களாவுக்குள் உடற்பயிற்சி கூடம், நவீன கழிப்பறை, மார்பிள் கிரானைட் விளக்குகள் போன்றவை அதில் இருக்கின்றன. தன்னை சாதாரண நபராக காட்டிக் கொள்ளும் அரவிந்த் கெஜ்ரிவால், 7 ஸ்டார் கண்ணாடி மாளிகையில் வசிக்கிறார் என துவக்கம் முதலே தெரிவித்து வருகிறோம். தற்போது அது நிரூபணமாகி உள்ளது. பல கோடி ரூபாய் செலவிட்டு, பங்களாவில் பல்வேறு வசதிகளை கெஜ்ரிவால் செய்திருக்கிறார். அரசு வீடு, கார், பாதுகாப்பு வேண்டாம் என பொய் சத்தியம் செய்பவர்கள், மக்களின் வரிப்பணத்தை எப்படி கொள்ளை அடிக்கின்றனர் பாருங்கள் எனவும் வீரேந்திர சச்தேவா கூறியுள்ளார். இதற்கு பதிலடி கொடுத்த, ஆம் ஆத்மி மூத்த தலைவரும், முன்னாள் துணை முதல்வருமான மணீஷ் சிசோடியா, “உத்தர பிரதேசம், ஹரியானா போன்ற மாநிலங்களில், பள்ளிகள், மருத்துவமனைகளில் அடிப்படை வசதிகள் கூட இல்லை. இதற்காக மக்கள் போராடுகின்றனர். அதை பற்றி கேள்வி கேட்பதற்கு பதில், அரவிந்த் கெஜ்ரிவாலின் பங்களா பற்றி பா.ஜவினர் பேசுவதாக குற்றம் சாட்டி உள்ளார்.