ரஜினி நடிப்பில் 2002ல் வெளியான பாபா படத்தில் அவர் சிகரெட் புகைக்கும் காட்சிகள் இடம்பெற்றிருந்தன. அந்த காட்சிகளை நீக்க வேண்டும் என அப்போது பா.ம.க எதிர்ப்பு தெரிவித்தது. படம் வெளியான தியேட்டர்களில், பா.ம.கவினர் போராட்டம் நடத்தியதால், மோதல் ஏற்பட்டது. படப்பெட்டியும் கடத்தப்பட்டது. அதற்கு பதிலடி தரும் வகையில், 2004 லோக்சபா தேர்தலில், திமுக கூட்டணியில் 6 தொகுதிகளில் போட்டியிட்ட பாமக வேட்பாளர்களுக்கு எதிராக, ரஜினி உத்தரவின் பேரில் அவரது ரசிகர்கள் தேர்தல் வேலை பார்த்தனர். பா.ம.கவுக்கு எதிராக ஓட்டு போடுமாறு, ரஜினியும் ரசிகர்களுக்கு உத்தரவிட்டார். அதில் இருந்து பா.ம.க - ரஜினி ரசிகர்கள் என இரு தரப்புக்கும் ஏழாம் பொருத்தம் தான். இந்த நிலையில் தான், சென்னை போயஸ் தோட்டத்தில் உள்ள வீட்டில் ரஜினியை சந்தித்திருக்கிறார் பா.ம.க தலைவர் அன்புமணியின் மகள் சங்கமித்ரா. இந்த சந்திப்பின்போது, சங்கமித்ரா தயாரித்துள்ள அலங்கு படத்தின் முன்னோட்ட காட்சிகள், ரஜினிக்கு காட்டப்பட்டன.