சர்வதேச அரங்கில் பல்வேறு நெருக்கடிகளை சந்தித்து வரும் கனடா பிரதமர் ஜஸ்டின் ட்ரூடோ உள்நாட்டிலும் பிரச்னைகளை சந்தித்து வருகிறார். ட்ரூடோ பதவி விலக வேண்டும் என்று அவரது சொந்த கட்சியான லிபரல் கட்சி எம்பிக்களே போர்க்கொடி தூக்கினர். இவர் மீண்டும் கனடா தேர்தலில் போட்டியிடக் கூடாது என்றும் வலியுறுத்தி வருகின்றனர். ட்ரூடோவை கட்சியின் தலைவர் பதவியில் இருந்து நீக்கி விட்டு வேறு ஒருவரை நியமிப்பது குறித்தும் ஆலோசித்து வந்தனர். ட்ரூடோ அரசுக்கு ஆதரவு கொடுத்து வந்த என்டிபி கட்சியும் ஆதரவை விலக்கி கொண்டது. அடுத்த பார்லிமென்ட் கூட்டத்தில் நம்பிக்கையில்லா தீர்மானத்திற்கு அழைப்பு விடுத்தது. உள்நாடு மற்றும் சர்வதேச பிரச்சினைகளை அவர் திறமை இல்லாமல் கையாளும் விதத்தை சுட்டிக்காட்டி அவர் பதவி விலக வேண்டும் என்ற நெருக்கடிக்கு தள்ளப்பட்டார். இந்த நிலையில் கனடா பிரதமர் ஜஸ்டின் ட்ரூடோ லிபரல் கட்சியின் தலைவர் பதவியில் இருந்து ராஜினாமா செய்தார். கட்சித் தலைவர் பதவியுடன் பிரதமர் பதவியையும் ராஜினாமா செய்வதாக கூறிய அவர் புதிய பிரதமர் தேர்வு செய்யப்படும் வரை தானே பதவியில் நீடிப்பதாகவும் அறிவித்தார். 2015ல் பிரதமரானது முதலே கனடாவுக்காகவும் கனேடிய மக்களுக்காகவும் பாடுபட்டு வந்துள்ளேன். நடுத்தர மக்களின் மேம்பாட்டிற்காக உழைத்துள்ளேன். வட அமெரிக்க கண்டத்தில் தடையில்லா வர்த்தகம் நீடிக்க உழைத்தேன் என்றார். குடும்பத்துடன் நடத்திய நீண்ட ஆலோசனைக்குப் பிறகு பதவி விலகும் முடிவுக்கு வந்தேன். எனக்கு அடுத்ததாக தலைமை வகிக்கும் நபரை கட்சி தேர்வு செய்ததை தொடர்ந்து இந்த முடிவை எடுத்து உள்ளேன். வரும் தேர்தலில் சிறந்த ஒருவரை பிரதமராக கனடா தேர்வு செய்யும் என்று ட்ரூடோ கூறியுள்ளார். 53 வயதாகும் ஜஸ்டின் ட்ருடோ கனடாவில் நீண்ட காலமாக பிரதமர் பொறுப்பில் இருந்தவர் என்ற பெயரை பெற்றுள்ளார்.