அதிமுக பொதுச்செயலாளர் பழனிசாமி திடீரென டில்லி சென்று உள் துறை அமைச்சர் அமித்ஷாவை அவரது வீட்டில் சந்தித்து பேசினார். பாஜ-அதிமுக கூட்டணி பற்றி அவர்கள் பேசியதாக பரபரப்பு தகவல் வெளியானது. இதன் தொடர்ச்சியாக அண்ணாமலையும் இன்று டில்லி புறப்பட்டு சென்றார். பழனிசாமியுடன் நடந்த பேச்சு வார்த்தை பற்றி அண்ணாமலையுடன் பேசவே அவரை அமித்ஷா அழைத்துள்ளார். இந்த நிலையில் எதிர்கட்சி துணை தலைவரும் அதிமுகவின் முன்னாள் அமைச்சருமான உதயகுமார், டில்லியில் நடந்த அமித்ஷா-பழனிசாமி சந்திப்பு குறித்து வீடியோ வெளியிட்டு அதிர வைத்துள்ளார். அதில் பழனிசாமியை தமிழகத்தின் இரும்பு மனிதர் என்றும், அமித்ஷாவை இந்தியாவின் இரும்பு மனிதர் என்றும் கூறி பரபரப்பை ஏற்படுத்தி உள்ளார். இதன் மூலம் டில்லியில் அதிமுக, பாஜ கூட்டணி பேச்சு நடந்ததை உதயகுமார் உறுதி செய்து விட்டார் என்கின்றனர்.