விழுப்புரத்தில் 21 சமூக நீதி போராளிகளுக்கான மணிமண்டபம் அரசு சார்பில் கட்டப்பட்டுள்ளது. திறப்பு விழா வரும் 29ல் நடக்கிறது. இந்த விழாவில் முதல்வர் ஸ்டாலின் கலந்து கொள்வார் என அறிவிக்கப்பட்டு உள்ளது. சமூக நீதி போராளிகள் குடும்பங்களுக்கும், சமூக நீதிக்காக குரல் கொடுத்து வரும் பாமக நிறுவனர் ராமதாசுக்கும் அழைப்பு விடப்படும் என அமைச்சர் பொன்முடி கூறியுள்ளார். ராமதாசை அழைப்பதற்கான ஏற்பாட்டை செய்யுமாறு, முதல்வர் ஸ்டாலின் உத்தரவிட்டிருப்பதாக விழுப்புரத்தில் நடந்த கட்சி நிர்வாகிகள் கூட்டத்தில் பேசியபோது அவர் சொன்னார். திமுக எதிர்ப்பு அரசியல் செய்து வரும் பாமகவும், அதன் தலைவர்களும் அரசின் அழைப்பை ஏற்று, ஸ்டாலினுடன் ஒரே மேடையில் பங்கேற்பரா என்ற கேள்வி எழுந்துள்ளது. இருப்பினும் இந்த கேள்விக்கு பாமக வட்டாரம் கூறும் பதில் வேறு விதமாக இருக்கிறது. சமூக நீதி போராளிகளின் தியாகத்தை போற்றும் நிகழ்ச்சி இது. பாமகவின் நீண்டகால கோரிக்கையும் கூட. அதனால், இந்த விழாவில் பங்கேற்பதில் ராமதாசுக்கு ஆட்சேபம் இருக்க வாய்ப்பில்லை. அவர் பங்கேற்காவிட்டாலும், அன்புமணியை அனுப்புவார் என தெரிவதாக விழுப்புரம் மாவட்ட நிர்வாகி ஒருவர் கூறினார். பாமகவின் அரசியல் எதிரியான திருமாவளவன், சமீப காலமாக நடிகர் விஜய், அதிமுகவை மையமாக வைத்து, அரசியல் ரீதியாக தன் முக்கியத்துவத்தை வளர்த்து வருகிறார். இது, ராமதாசுக்கு அறவே பிடிக்கவில்லை. அதனால், முதல்வர் ஸ்டாலினுடன் ஒரே மேடையில் தோன்றி, திமுக கூட்டணிக்கு போக்கு காட்டும் திருமாவளவனுக்கு, ராமதாசால் அதிர்ச்சி வைத்தியம் கொடுக்க முடியும். இதன் மூலம், அரசியல் ரீதியான நடுக்கத்தை திருமாவளவனுக்கு ஏற்படுத்த முடியும் என கருதியே, திமுக தலைமையும் பாமகவை அழைக்கிறது. வன்னியர் இன ஓட்டுகளுக்காக நிகழ்ச்சி அரசு தரப்பில் நடத்தப்படுவதாக, வெளிப்படையான காரணம் சொல்லப்பட்டாலும்கூட, ராமதாஸை நிகழ்ச்சிக்கு அழைப்பதன் பின்னணி இதுவாகத்தான் இருக்க முடியும். அடுத்து ஆளப் போகும் கட்சியுடன்தான் கூட்டணி என, அன்புமணி தொடர்ந்து கூறி வரும் நிலையில், இந்த வாய்ப்பை பாமக பயன்படுத்திக்கொள்வதே சரியான அணுகுமுறையாக இருக்கும் என்றும் அவர் சொன்னார்.