சென்னையில் கடந்த 6ம் தேதி நடந்த அம்பேத்கர் புத்தக வெளியீட்டு விழாவில் தமிழக வெற்றிக் கழக தலைவர் நடிகர் விஜய், ஆதவ் அர்ஜுனா உள்பட பலர் பங்கேற்றனர். இந்த நிகழ்ச்சியில் பேசிய ஆதவ் அர்ஜுனா, தமிழகத்தில் மன்னராட்சி நடக்கிறது. பிறப்பால் அனைவரும் சமம் என்ற கருத்தியலை அம்பேத்கர் உருவாக்கியதுபோல், பிறப்பால் இனி ஒருவர் முதல்வர் ஆகக்கூடாது என திமுகவை மறைமுகமாக விமர்சித்தார். இதனால் கட்சியின் கட்டுப்பாடுகளை மீறி செயல்பட்டதாக கூறி, ஆதவ் அர்ஜுனாவை 6 மாதங்கள் கட்சியில் இருந்து திருமாவளவன் சஸ்பெண்ட் செய்தார். தொடர்ந்து திமுக எதிர்ப்பு மனநிலையில் இருந்ததால், மறைமுக திட்டம் வகுத்து ஆதவ் அர்ஜுனா செயல்படுவதாக திருமாவளவன் கூறினார். இந்நிலையில் விடுதலை சிறுத்தைகள் கட்சியில் இருந்து நிரந்தரமாக விலகுவதாக ஆதவ் அர்ஜுனா திருமாவளவனுக்கு கடிதம் எழுதியுள்ளார்.