உள்ளூர் செய்திகள்

பெண்மை என் பெருமை

கடந்த ஏப்ரல் மாதம்; 'கொரோனா' அச்சுறுத்தலால் சென்னை - அயனாவரம் காய்கறி சந்தை இடம் மாற்றம் செய்யப்பட்டிருந்த மைதானம்.குவிந்து கிடக்கும் பெரிய வெங்காயத்தில் அரை கிலோ பொறுக்கி நிமிரும் சொற்ப வினாடிகளுக்குள், பசியாறி முடிக்கிறார் ஓர் இளைஞர்.'ருசிச்சு சாப்பிடணும்னு நேரத்தை கொன்னு பழகிட்டா, நாளைக்கு பசிக்கு சாப்பிட எதுவும் கிடைக்காதுண்ணா; சம்பாதிக்கிற நேரத்துல சம்பாதிச்சிடணும்!'என்ன சாந்தியம்மா... உங்க மூத்த மகன் பணம்தான் முக்கியம்ங்கிறாரு?'உழைச்சு சாப்பிடணும்; மனுஷனுக்கு உழைப்புதான் அடையாளம்'னு புரிஞ்சு வைச்சிருக்கிற என் பிள்ளையை, பணத்துக்கு முக்கியத்துவம் கொடுக்கிறதா சொல்றீங்களே... நியாயமா?சுற்றி நிற்கும் வாடிக்கையாளர்களுக்கு காய்கறிகளை எடை போட்டு தந்தபடி, அவரவர் வாங்கியதை மிகச்சரியாக நினைவு வைத்தபடி, கணக்கு பார்த்து பணம் வாங்கி மிச்சம் கொடுத்தபடி... இடையிடையே மகன் முகக்கவசம் முறையாக அணிந்திருக்கிறானா என்பதை உறுதிப்படுத்தியபடி... தன் பெண்மையை உழைப்பால் கவுரவப்படுத்திக் கொண்டிருந்தார் சாந்தி.என்ன படிச்சிருக்கீங்கம்மா?ஒண்ணாவது வகுப்புக்கு போனதா ஞாபகம்; அவ்வளவுதான்!அப்புறம் எப்படி இந்த கணக்கு வழக்கெல்லாம்?பிறந்ததுல இருந்து அம்மா, அப்பா கூட காய்கறி கடையே கதின்னு கிடந்தேன்; அதுல கத்துக்கிட்டதுதான் இதெல்லாம்!சாந்தி அம்மாவுக்கு வயது, 50. பிறந்தது, வளர்ந்தது எல்லாமே சென்னையில். 16 வயதில் தாய்மாமனுடன் திருமணம். மூன்று ஆண், ஒரு பெண் என நான்கு பிள்ளைகள். ஏழு ஆண்டுகளுக்கு முன் கணவர் மரணிக்க, பிள்ளைகளும், பேரனுமே வாழ்க்கை என்றிருக்கிறார்.'எங்க அம்மா சாந்தி'ன்னு பசங்க பெருமையா பேசுறாங்களா?எதுக்கு பேசணும்; பெத்து வளர்க்குறது பெருமை இல்ல... கடமை! என் பிள்ளைகளுக்கு அம்மாவை பிடிக்கும்; நான் அம்மாவா இருக்குறேன்; அவ்வளவுதான்!'டிவி', துாக்கம்னு பொழுது போக்குற பெண்களைப் பார்த்தா ஏக்கமா இருக்குதா?ஆண் சம்பாதிக்கிற காசுல பெண் வாழ்றது... வரம்; ஆணாகவும் இருந்து பெண் உழைக்கிறது... தவம். இந்த தவத்துல ஏக்கத்துக்கு எல்லாம் வாய்ப்பே இல்லை!சரி... என்ன சொல்லுது கொரோனா?'வாழ்க்கையில போராடி நாலு பிள்ளைகளை கரையேத்துன நீ, முடிஞ்சா என்னை ஜெயிச்சுப் பாரு'ன்னு சொல்லுது. 'சரி... பார்ப்போம்'னு நானும் கடையில நிற்கிறேன்; பசங்க என் கூட நிற்கிறாங்க!ஒரு ஆசை?நான் உள்ளிழுக்கிற கடைசி மூச்சுலேயும் காய்கறி வாசம் இருக்கணும்.புதுப்புது அர்த்தங்கள்*வாழ்க்கை? - அனுபவம்*நாணயம்? - நாடகம்


தினமலர் சேனல்களுக்கு SUBSCRIBE செய்யுங்கள் !