உலகின் வயதான கொரில்லாவிற்கு பிறந்த நாள்

இயற்கையின் படைப்பில் மிகவும் பிரமிக்கத்தக்க உயிரினங்களில் ஒன்று கொரில்லா. இவை மனிதக் குரங்கு இனத்தைச் சேர்ந்தவை. உருவத்தில் மிகப் பெரியதாகவும், அச்சுறுத்தும் தோற்றத்தைக் கொண்டிருந்தாலும், இவை உண்மையில் மிகவும் அமைதியான மற்றும் அறிவார்ந்த விலங்குகள்.கொரில்லாக்கள் மனிதர்களுக்கு மிக நெருக்கமான உயிரினங்கள். மரபணு ரீதியாக (DNA) இவை மனிதர்களுடன் சுமார் 98.3% ஒத்துப்போகின்றன. சிம்பன்சி மற்றும் போனொபோக்களுக்கு அடுத்தபடியாக மனிதர்களின் நெருங்கிய உறவினர்களாக இவை கருதப்படுகின்றன.பொதுவாகக் குரங்குகளுக்கு வால் இருக்கும், ஆனால் கொரில்லாக்களுக்கு வால் கிடையாது. இதுவே இவற்றை சாதாரண குரங்குகளில் இருந்து வேறுபடுத்தும் முக்கிய அடையாளம். இவை கைகளை விடக் கால்கள் நீளமாகவும், தரையில் நடக்கும்போது கைகளின் விரல் மூட்டுகளைப் பயன்படுத்தி நடக்கும் பழக்கம் கொண்டவை.கொரில்லாக்கள் கூட்டமாக வாழும் சமூக விலங்குகள். ஒரு கூட்டத்தை ஒரு வலுவான ஆண் கொரில்லா வழிநடத்தும். அந்த ஆண் கொரில்லாவின் முதுகில் வெள்ளி நிற ரோமங்கள் வளர்ந்திருப்பதால், அது 'சில்வர்பேக்' என்று அழைக்கப்படுகிறது. இது கூட்டத்தைப் பாதுகாப்பதோடு, எங்கு உணவு தேட வேண்டும் என்பதையும் தீர்மானிக்கிறது.கொரில்லாக்கள் பெரும்பாலும் தாவர உண்ணிகள் . இவை மூங்கில் குருத்துகள், இலைகள், தண்டுகள், மற்றும் பழங்களை உணவாக உட்கொள்கின்றன. சில நேரங்களில் சிறிய பூச்சிகளையும் இவை உண்ணும். ஒரு வளர்ந்த ஆண் கொரில்லா ஒரு நாளைக்கு சுமார் 18 முதல் 20 கிலோ வரை உணவை உட்கொள்ளும் திறன் கொண்டது.மனிதர்களுக்கு எப்படி கைரேகை இருக்கிறதோ, அதேபோல் ஒவ்வொரு கொரில்லாவிற்கும் அதன் மூக்கின் வடிவம் தனித்துவமானது. உயிரியல் ஆராய்ச்சியாளர்கள் இந்த மூக்கு அடையாளங்களை வைத்தே ஒவ்வொரு கொரில்லாவையும் தனித்தனியாக அடையாளம் காண்கின்றனர்.கொரில்லாக்கள் மிகவும் புத்திசாலித்தனமானவை. இவை காடுகளில் கருவிகளைப் பயன்படுத்தும் திறன் கொண்டவை (உதாரணமாக, நீரின் ஆழத்தைச் சோதிக்கக் குச்சியைப் பயன்படுத்துவது). மேலும், இவை மனிதர்களைப் போலவே மகிழ்ச்சி, துக்கம், பயம் போன்ற உணர்வுகளை வெளிப்படுத்தும். சில கொரில்லாக்கள் மனிதர்களின் சைகை மொழியைக் கற்றுக்கொண்டு தொடர்புகொள்ளும் திறனையும் பெற்றுள்ளன.இயற்கையான சூழலில் கொரில்லாக்கள் 35 முதல் 40 ஆண்டுகள் வரை வாழ்கின்றன. ஆனால், மனிதர்களின் பராமரிப்பில் (உயிரியல் பூங்காக்களில்) இவை 50 ஆண்டுகளைக் கடந்தும் வாழ்கின்றன. ஜெர்மனியின் பெர்லின் பூங்காவிலுள்ள 'பாட்டு' என்ற பெண் கொரில்லா 69 வயதைக் கடந்து உலகின் மிக வயதான கொரில்லாவாகத் திகழ்கிறது.பூங்காவின் பெருமையாகவும் ராணியாகவும் திகழும் இந்த பாட்டு கொரில்லாவிற்கு இன்று பிறந்த நாள் என்பதால் அதற்கு சிறப்பு உணவை கொடுத்து கொண்டாடினர்.கொரில்லாக்கள் காடுகளின் பாதுகாவலர்கள். காடுகளை அழிப்பதாலும், வேட்டையாடப்படுவதாலும் இவை தற்போது அழிந்து வரும் உயிரினங்களின் பட்டியலில் உள்ளன. இந்த உன்னதமான உயிரினங்களைப் பாதுகாப்பது இயற்கையின் சமநிலையைப் பேண மிகவும் அவசியமாகும்.-எல்.முருகராஜ்.