மும்பை மாட்டுவண்டி பந்தயம்

பாரம்பரிய 'பைல்கடா ஷர்யாத்' மாட்டு வண்டிப் பந்தயம்!மஹாராஷ்டிராவின் கிராமப்புறத் திருவிழாக்கள் என்றாலே அங்கு ஆன்மீகக் கொண்டாட்டங்களைத் தாண்டி, மண்ணின் வீரத்தைப் பறைசாற்றும் 'பைல்கடா ஷர்யாத்' எனப்படும் பாரம்பரிய மாட்டு வண்டிப் பந்தயத்தின் அதிரடி சத்தம் தான் முதலில் கேட்கும்.கிராமத்துப் பெருமையின் அடையாளமாகவும், விவசாயிகளின் உணர்வாகவும் திகழும் இந்த வீர விளையாட்டு, இம்முறையும் சதாரா மாவட்டத்தின் பெட்கான் கிராமத்தில் நெஞ்சை உறைய வைக்கும் விறுவிறுப்புடன் அரங்கேறியது.இந்த பிரம்மாண்டமான பாரம்பரியப் போட்டியில் பங்கேற்பதற்காக, சுற்றியுள்ள பல்வேறு கிராமங்களில் இருந்து 450-க்கும் மேற்பட்ட மாட்டு வண்டிகள் தங்களின் இலக்கை நோக்கி களம் இறங்கின.போட்டிக்கான ஏற்பாடுகள் முடிந்து, மைதானத்தைச் சுற்றி ஆயிரக்கணக்கான மக்கள் ஆவலோடு கூடி நிற்க, பந்தயம் தொடங்குவதற்கான சிக்னல் கிடைத்த அடுத்த நொடி எல்லையை நோக்கிச் சீறிப் பாய்ந்தன காளைகள். கண்ணிமைக்கும் நேரத்தில் வெற்றி இலக்கை எட்ட வேண்டும் என்ற வெறியோடு, போட்டியாளர்கள் தங்கள் மாட்டு வண்டிகளைச் சாட்டையைச் சுழற்றி, காற்றில் பறப்பது போல் விரட்டிச் சென்றனர். காளைகளின் காலடிப் பட்ட இடமெல்லாம் மைதானமே புழுதிப் படலமாக மாற, பூமியே அதிரும் வகையில் சீறிப் பாய்ந்த காளைகளின் வேகமும், எல்லையை நோக்கி வண்டிகள் நெருங்க நெருங்க கூடியிருந்த கூட்டத்தின் ஆரவாரமும் விண்ணைப் பிளந்தது. காளைகளின் குளம்பொலிக்கும் இடையே பந்தயக் களம் திக் திக் நிமிடங்களால் ஸ்தம்பித்தது.இந்தப் பரபரப்பான போட்டியில் வெற்றி பெற்ற வண்டிகளின் உரிமையாளர்களுக்குப் பெருந்தொகை பரிசுத் தொகையாக வழங்கப்பட்டது. போட்டியை நடத்திய அமைப்பாளர்கள் சார்பில், இலட்சக்கணக்கான ரூபாய் ரொக்கப் பரிசுடன், 'கேசரி' போன்ற மதிப்புமிக்க பட்டங்களும், பைக் மற்றும் தங்க நாணயங்களும் சிறந்த காளைகளின் உரிமையாளர்களுக்குப் பரிசாக வழங்கி கௌரவிக்கப்பட்டது.'பைல்கடா ஷர்யாத்' என்பது வெறும் பந்தயம் மட்டுமல்ல; அது மராட்டிய மண்ணின் வீரம், கலாச்சாரம் மற்றும் மனிதர்களுக்கும் காளைகளுக்கும் இடையே உள்ள பிணைப்பை உணர்த்தும் ஒரு வாழ்வியல் திருவிழாவாகும். இந்த விளையாட்டில் பரிசுத் தொகையை விடத் தங்களின் காளைகள் பெறும் கௌரவத்தையே விவசாயிகள் பெருமையாகக் கருதுகின்றனர். அந்த வகையில் சதாரா மாவட்டத்தின் பெட்கான் கிராமத்தில் நடந்த இந்த மாட்டு வண்டிப் பந்தயம், கூடியிருந்த ஒட்டுமொத்த ரசிகர்களுக்கும் ஒரு மறக்க முடியாத, நெஞ்சை உறைய வைக்கும் விறுவிறுப்பான அனுபவத்தைத் தந்து நிறைவடைந்தது.