சிரஞ்சீவி பட டீசர்களில் 'விஷ்வம்பரா' டீசர் சாதனை

தெலுங்குத் திரையுலகத்தின் சீனியர் நடிகர் சிரஞ்சீவி. இடையில் சிறிது காலம் அரசியல் பக்கம் போய்விட்டு, பின் மீண்டும் சினிமா பக்கமே திரும்பியவர். 'கைதி நம்பர் 150' படம் மூலம் ரீஎன்ட்ரி கொடுத்தவர் அடுத்து 'சை ரா நரசிம்ம ரெட்டி, ஆச்சார்யா, காட்பாதர், வால்டல் வீரய்யா, போலா சங்கர்' ஆகிய படங்களில் நடித்தார்.

அந்தப் படங்களின் டீசர்களுக்குக் கிடைக்காத வரவேற்பு நேற்று காலை வெளியான 'விஷ்வம்பரா' படத்தின் டீசருக்குக் கிடைத்துள்ளது. 24 மணி நேரத்தில் அந்த டீசர் 20 மில்லியனுக்கும் அதிகமான பார்வைகளைப் பெற்று சாதனை படைத்துள்ளது.

சிரஞ்சீவி நடித்து இதற்கு முன்பு வெளியான 'போலா சங்கர்' படத்தின் டீசருக்கு 24 மணி நேரத்தில் 12 மில்லியன் பார்வைகள் மட்டுமே கிடைத்தது. அந்த சாதனையை தற்போது 'விஷ்வம்பரா' டீசர் முறியடித்துள்ளது.

மேலும், தெலுங்குத் திரையுலகத்தில் வெளியான 24 மணி நேரத்தில் அதிகப் பார்வைகளைப் பெற்ற டீசராக 4வது இடத்தைப் பிடித்துள்ளது. 'ராதேஷ்யாம், சர்காருவாரி பாட்டா, புஷ்பா' ஆகிய படங்களின் டீசர்கள் முதல் மூன்று இடங்களைப் பிடித்துள்ளன.