மகளுக்கு டைட்டில் கார்டில் இடம் கொடுத்த மணிரத்னம் ; நன்றி சொன்ன குஷ்பு

நடிகை குஷ்பு, இயக்குனர் சுந்தர்.சி இருவரும் அவரவர் துறைகளில் சாதனைகளை படைத்தவர்கள். இந்த தம்பதிகளின் வாரிசுகளான அவந்திகா, அனந்திதா இருவருமே சினிமாவில் நுழையும் முயற்சியில்தான் ஈடுபட்டுள்ளார்கள். அந்த வகையில் சமீபத்தில் மணிரத்னம் இயக்கத்தில் வெளியான 'தக் லைப்' திரைப்படத்தில் உதவி இயக்குனராக பணியாற்றினார் அனந்திதா. அதே சமயம் முழங்கால் எலும்பு முறிவால் சிகிச்சை பெற்றுவந்த அவரால் தொடர்ந்து படப்படிப்பில் பணியாற்ற முடியவில்லை... இந்த நிலையில் தக் லைப் படம் வெளியானபோது டைட்டில் கார்டில் உதவி இயக்குனர்கள் பெயர் பட்டியலில் அனந்திதாவின் பெயரும் இடம் பெற்றுள்ளது.

இதனை தொடர்ந்து படம் பார்த்த குஷ்பு ரொம்பவே மகிழ்ந்து போய் இயக்குனர் மணிரத்னத்திற்கு தனது நன்றியை தெரிவித்துள்ளார். “ஒரு பெற்றோராக எனது மகளின் பெயரை மணிரத்னம் படத்தில் அதுவும் அவரது உதவியாளர் பட்டியலில் பார்க்கும்போது பெருமிதமாக இருக்கிறது. அவள் காலில் அடிபட்டு சிகிச்சை எடுப்பதற்கு முன்பாக கொஞ்ச காலம் மட்டுமே தக் லைப் படத்தில் பணியாற்றி இருந்தாலும் மறக்காமல் அவளுடைய பெயரையும் டைட்டில் கார்டில் இடம்பெறச் செய்த மணி சாருக்கு நன்றி” என்று கூறியுள்ளார்.