விஜய்க்கு அரசியல் கட்சி துவங்க தைரியம் வந்ததே இப்படித்தான் : பார்த்திபன் வெளியிட்ட தகவல்

ஜனநாயகன் படத்தில் நடித்து முடித்திருக்கும் விஜய், அடுத்தபடியாக முழு நேர அரசியல்வாதியாக உருவெடுக்கிறார். இந்த நிலையில், விஜய் அரசியல் கட்சி தொடங்குவதற்கு தைரியம் வந்ததற்கு இதுதான் காரணம் என்று சொல்லி நடிகர் பார்த்திபன் தனது எக்ஸ் பக்கத்தில் ஒரு பதிவு போட்டுள்ளார்.

அந்த பதிவில், கல்யாணசுந்தரம் போட்டோ செஷனோடு முடிந்தது. கைவிடப்பட்ட படம். ஆனால் பூஜை அன்று 10 ஜோடிகளுக்கு என் சொந்த செலவில் தாலி முதல் மெட்டி வரை தட்டு பொட்டு சாமான்களும் சீர் செய்து சினிமா பூஜைகளை பிரயோஜனமாகவும் செய்யலாம் என தொடங்கி வைத்தேன். அதுவே பின் தொடரப்பட்டது பலரால். பின்னொரு காலத்தில் விஜய் என் தலைமையில் 16 ஜோடிகளுக்கு திருமணம் செய்து வைத்தார். இதன் மூலம் புண்ணியம் சேர்த்துக் கொள்ளும் விஜய்தான் மணமக்களுக்கு நன்றி சொல்ல வேண்டும் என அப்போது புரட்டிப் பேசினேன். அப்படிப்பட்ட நல்ல காரியங்கள் எல்லாம் சேர்ந்துதான் அவருக்கு கட்சி துவங்கும் தைரியம் வந்தது என்று தெரிவித்திருக்கிறார் பார்த்திபன்.