3 நாட்களில் 200 கோடி வசூலித்த 'ஓஜி'

சுஜித் இயக்கத்தில், தமன் இசையமைப்பில், பவன் கல்யாண், பிரியங்கா மோகன், அர்ஜுன் தாஸ், பிரகாஷ்ராஜ், ஸ்ரேயா ரெட்டி மற்றும் பலர் நடிப்பில் கடந்த வாரம் வெளியான தெலுங்குப் படம் 'ஓஜி'. இப்படம் முதல் நாளில் 154 கோடி வசூலித்ததாக தயாரிப்பு நிறுவனம் அதிகாரப்பூர்வமாக அறிவித்தது.

அதற்கடுத்த நாட்களிலும் இப்படத்திற்கான வரவேற்பு அப்படியே உள்ளது. முதல் நாளில் ஆந்திரா, தெலுங்கானாவில் ஏறக்குறைய அனைத்து தியேட்டர்களிலும் இப்படம் திரையிடப்பட்டது. அதனால், முதல் நாள் வசூல் அவ்வளவு இருந்தது. அடுத்த நாட்களில் தியேட்டர்கள் குறைந்ததால் வசூலும் குறைந்தது. இருந்தாலும் மூன்றே நாட்களில் இப்படம் 200 கோடி வசூலைக் குவித்துள்ளதாக பாக்ஸ் ஆபீஸ் வட்டாரங்கள் தெரிவிக்கின்றன.

பவன் கல்யாண் நடித்து இதுவரை வெளிவந்த படங்களில் இந்த 'ஓஜி' படம்தான் முதல் முறையாக 200 கோடி வசூலைக் கடந்த படமாக அமைந்துள்ளது. இதற்கு முன்பு 2022ல் வெளிவந்த 'பீமலா நாயக்' படம் 160 கோடி வசூலித்ததே அவரது அதிகபட்ச வசூல் படமாக இருந்தது.