பிளாஷ்பேக்: தமிழில் டப் செய்யப்பட்ட கார்த்திக் படம்

தமிழ் நடிகரான கார்த்திக் பிற மொழிகளில் நடித்தது மிகவும் குறைவு. அப்படி அவர் நடித்த பிற மொழி படங்களில் முக்கியமானது தெலுங்கில் வெளிவந்த 'அன்வேஷ்னா'. இந்த படத்தை வம்சி இயக்கினார். கார்த்திக்குடன் பானுப்பிரியா, கைகல சத்யநாராயணா, சரத்பாபு, ரலாபல்லி உள்ளிட்ட பலர் நடித்திருந்தார்கள். இளையராஜா இசை அமைத்திருந்தார். வம்சி இயக்கி இருந்தார்.

மனிதர்களை வேட்டையாடும் ஒரு புலியை தேடிச் செல்லும் காட்டிலாகா அதிகாரியின் கதை. முழு படமும் அடர்ந்த காட்டிற்குள் எடுக்கப்பட்டது. இன்றளவும் தெலுங்கு சினிமாவின் முக்கியமான த்ரில்லர் படமாக போற்றப்படுகிறது. 11 தியேட்டர்களில் 100 நாளையும், 6 தியேட்டர்களில் வெள்ளி விழாவும் கண்ட படம். இதில் கார்த்தி முரளி (இயற்பெயர்) என்ற பெயரில் நடித்தார்.

தெலுங்கில் பெரிய வெற்றி பெற்றதால் 'பாடும் பறவைகள்' என்ற பெயரில் தமிழில் டப் செய்து வெளியிடப்பட்டது. தெலுங்கு அளவிற்கு வெற்ற பெறாவிட்டாலும் ஓரளவிற்கு வரவேற்பை பெற்றது. பிற மொழியில் இருந்து தமிழுக்கு டப் செய்யப்பட்ட கார்த்திக்கின் ஒரே படம் இது.