மன வருத்ததுடன் பாலிவுட் பக்கம் கவனத்தை திருப்பும் ராஷி கண்ணா ; காரணம் இதுதான்
நடிகை ராஷி கண்ணா அறிமுகமானது ஹிந்தி படத்தில் தான் என்றாலும் அதைத் தொடர்ந்து தெலுங்கு படங்களில் சில வருடங்களில் நடித்தவர், பின்னர் தமிழிலும் குறிப்பிடத்தக்க நடிகையாக மாறி தொடர்ந்து இரண்டு மொழிகளிலும் பிஸியாக நடித்து வருகிறார். அதேசமயம் ஹிந்தியில் நடிப்பதையும் குறைத்துக் கொண்டார்.
இந்த நிலையில் தான் கடந்த வருடம் முதல் ஹிந்தி படங்களில் மீண்டும் நடிக்க துவங்கியுள்ளார் ராஷி கண்ணா. அது மட்டுமல்ல தென்னிந்திய படங்களில் இனி கவனம் செலுத்தாமல் பாலிவுட் பக்கமே கவனம் செலுத்த போவதாக சமீபத்திய பேட்டி ஒன்றிலும் அவர் சூசகமாக கூறியுள்ளார்.
இதுகுறித்து அந்த பேட்டியில் அவர் கூறும்போது, “தென்னிந்திய திரைப்படங்களுடன் ஒப்பிடும்போது வடக்கே நடிப்புக்கு ஒரு எல்லை என எதுவும் இல்லை. தென்னிந்தியாவில் நிறைய கமர்சியல் படங்களில் நடித்திருந்தாலும் இப்போது ஹிந்தியில் மீண்டும் நுழைவதற்கான சரியான தருணம் என நினைக்கிறேன். கதையை மையப்படுத்திய படங்கள் நிறைய தேடி வருகின்றன. தென்னிந்தியாவில் கமர்சியல் படங்களில் நடிப்பது ஓகே தான் என்றாலும் கூட அதில் எனக்கு குறிப்பிட்ட எல்லை உண்டு. ஒரு நடிகையாக நான் அந்த எல்லைகளை கடந்து என்னுடைய அடையாளத்தை உருவாக்க விரும்புகிறேன்” என்று கூறியுள்ளார்.