லோகேஷ் கனகராஜ், அமீர் கான் படம், பேச்சுவார்த்தையில்…

ரஜினிகாந்த் நடிக்க லோகேஷ் கனகராஜ் இயக்கத்தில் இந்த வருடம் வெளிவந்த 'கூலி' படத்தில் ஹிந்தி நடிகர் ஆமிர்கான் சிறப்புத் தோற்றத்தில் நடித்திருந்தார். ஆனால், அவரது கதாபாத்திரம் குறித்து இருவேறு விதமான கருத்துக்கள் நிலவியது. அப்படத்தில் நடித்தது குறித்து அமீர்கான் கவலைப்பட்டுப் பேசியதாக பொய்ச் செய்திகள் வெளிவந்தன. அதன்பின் அமீர் தரப்பிலிருந்து அப்படி எதுவும் பேசவில்லை என விளக்கமளிக்கப்பட்டது.

இதனிடையே, ரஜினிகாந்த் - கமல்ஹாசன் இருவரும் இணைந்து நடிக்கும் படத்தை லோகேஷ் இயக்குவார் என்று முதலில் சொல்லப்பட்டது. ஆனால், 'கூலி' படத்தில் ரஜினி திருப்தியடையவில்லை அதனால், லோகேஷ் இயக்க மாட்டார் என்றும் செய்திகள் வந்தன.

தெலுங்கு நடிகரான அல்லு அர்ஜுன் நாயகனாக நடிக்க உள்ள படத்தை லோகேஷ் இயக்கப் போகிறார் என கடந்த வாரம் தகவல் வெளியானது. அதனால், அமீர் - லோகேஷ் படம் நடக்குமா என்ற சந்தேகம் எழுந்தது. இருந்தாலும் இந்தப் படத்திற்கான பேச்சுவார்த்தைகள் நடந்து வருவதாக அமீர் தெரிவித்துள்ளதாக செய்திகள் வெளியாகி உள்ளன. அனேகமாக அமீர் படத்தை முடித்த பிறகே அல்லு அர்ஜுன் படத்தை இயக்க லோகேஷ் போவார் என்கிறார்கள்.