தொடரும் பட இயக்குனரின் புதிய படத்தில் வித்தியாசமான பெயரில் நடிக்கும் மோகன்லால்

கடந்த வருடம் மோகன்லால் நடிப்பில் மலையாளத்தில் தொடரும் திரைப்படம் வெளியானது. ரசிகர்களின் மிகப்பெரிய வரவேற்பை பெற்று வெற்றி பெற்ற இந்த படம் கிட்டத்தட்ட 230 கோடி வரை வசூல் செய்தது. இந்த படத்தை இயக்குனர் தருண் மூர்த்தி இயக்கியிருந்தார். இந்த நிலையில் மீண்டும் தருண் மூர்த்தி டைரக்ஷனிலேயே இந்த வருடமும் ஒரு புதிய படத்தில் மோகன்லால் நடிக்க இருக்கிறார். இதற்கான அதிகாரப்பூர்வ அறிவிப்பும் சமீபத்தில் வெளியானது.

இந்த படத்தில் மோகன்லால் ஒரு போலீஸ் அதிகாரி கதாபாத்திரத்தில் நடிப்பதாக சொல்லப்பட்டு வந்த நிலையில் தற்போது அவரது கதாபாத்திர போஸ்டரும் வெளியாகி உள்ளது. இதில் வழக்கத்திற்கு மாறாக சற்று தடித்த மீசையுடன் மோகன்லால் காணப்படுகிறார். அது மட்டுமல்ல இந்த படத்தில் டி.எஸ் லவ்லாஜன் என்பதுதான் அவரது கதாபாத்திர பெயர். மலையாள சினிமாவில் இதுவரை வைக்கப்பட்டிராத, அவ்வளவு ஏன் மலையாள ரசிகர்களே கூட கேள்விப்பட்டிராத ஒரு பெயராகத்தான் இது இருக்கிறது.