அர்ஜுன், ஏ.ஜி.எஸ் நிறுவனம் படத்தின் படப்பிடிப்பு நிறைவு

தமிழ் சினிமாவில் ஆக் ஷன் கிங் ஆக வலம் வருபவர் அர்ஜூன். கதாநாயகனாக 150க்கும் மேற்பட்ட படங்களில் நடித்துள்ளார். சமீபகாலமாக ஹீரோ மட்டுமின்றி வில்லன், குணச்சித்ர வேடங்களிலும் நடிக்கிறார். சிறு இடைவெளிக்கு பின் மீண்டும் கதாநாயகனாக ஒரு படத்தில் நடித்து வருகிறார். இதை ஏ.ஜி.எஸ் நிறுவனம் தங்களது 28வது படமாக தயாரிக்கின்றனர். பிரதீப் ரங்கநாதனின் உதவி இயக்குநர் சுபாஷ் என்பவர் இயக்கியுள்ளார்.

இந்த படத்தில் அர்ஜுனுக்கு ஜோடியாக ‛விருமாண்டி' புகழ் அபிராமி நடிக்கிறார். இவர்களது மகள் கதாபாத்திரத்தில் ஸ்டார் படத்தின் மூலம் பிரபலமான பிரீத்தி முகுந்தன் நடிக்கிறார். மேலும் விவேக் பிரசன்னா, ஜான் கொக்கென், அர்ஜுன் சிதம்பரம், பவன், திலீபன், வினோத் சாகர் உள்ளிட்டோர் முக்கிய கதாபாத்திரங்களில் நடிக்கின்றனர். கே.ஜி.எப் இசையமைப்பாளர் ரவி பசூர் இசையமைக்கிறார்.

ஆக் ஷன், பேமிலி டிராமா ஜானரில் உருவாகி வரும் இந்த படத்தின் படப்பிடிப்பு கடந்த சில மாதங்களாக சென்னையில் நடந்து வந்தது. நேற்று இந்த படத்தின் படப்பிடிப்பு முழுவதும் நிறைவு பெற்றுள்ளதாக படக்குழு அறிவித்துள்ளனர். படத்திற்கு இன்னும் தலைப்பு வைக்கவில்லை.