மோகன்லால் மம்முட்டிக்கு நான் வில்லன் தான் ; உறுதி செய்த பஹத் பாசில்

நடிகர் பஹத் பாசில் எப்போது தமிழ் மற்றும் தெலுங்கு என தென்னிந்திய மொழிகளில் கவனம் செலுத்த ஆரம்பித்தாரோ அப்போதிருந்தே கதாநாயகனாக மட்டுமில்லாமல் வில்லன் கதாபாத்திரங்களிலும் நடிக்க துவங்கினார். அதற்கு ஏற்ற வகையில் 'புஷ்பா' மற்றும் 'மாமன்னன்' படங்களில் அவரது வில்லத்தனமான நடிப்பு இன்னும் அதிக ரசிகர்களை அவருக்கு தேடித்தந்தது. அதே சமயம் மலையாளத்தில் அவர் கதாநாயகனாக மட்டுமே நடித்து வந்தார். இந்த நிலையில் தற்போது மம்முட்டி மோகன்லால் குஞ்சாக்கோ போபன் ஆகியோருடன் இணைந்து 'பேட்ரியாட்' என்கிற படத்தில் நடித்துள்ளார் பஹத் பாசில்.

நான்கு முக்கிய நடிகர்கள் இந்த படத்தில் நடித்துள்ள நிலையில் இதில் வில்லன் யார், அதற்காக தனியாக ஒரு பாலிவுட் நட்சத்திரம் ஏதும் நடித்திருக்கிறாரா என்கிற எதிர்பார்ப்பும் யூகங்களும் ரசிகர்களிடம் இருந்து வருகிறது. இந்த நிலையில் சமீபத்திய நிகழ்ச்சி ஒன்றில் கலந்து கொண்டு பேசிய பஹத் பாசில், ''பேட்ரியாட் படத்தில் நான் வில்லனாகத்தான் நடிக்கிறேன்'' என உண்மையை போட்டு உடைத்துள்ளார். மீண்டும் ஒரு வில்லத்தனமான நடிப்பை அவரிடம் இருந்து பார்க்க ரசிகர்கள் ஆவலாக காத்திருக்க துவங்கியுள்ளனர்.