ரஜினிகாந்த் சம்பளம் பற்றி பரவும் தகவல்

ரஜினிகாந்த் தற்போது நெல்சன் இயக்கத்தில் 'ஜெயிலர் 2' படத்தில் நடித்து வருகிறார். இந்தப் படத்தின் படப்பிடிப்பு விரைவில் முடிவடைய உள்ளதாக செய்திகள் வெளியாகி உள்ளது.

இதற்கடுத்து கமல்ஹாசனின் தயாரிப்பு நிறுவனத்தில் சிபி சக்ரவர்த்தி இயக்கத்தில், 173வது படத்தில் நடிக்க உள்ளார். இந்தப் படத்திற்காக அவர் வாங்கும் சம்பளம் எவ்வளவு என்பது குறித்து தகவல் வெளியாகவில்லை. ஆனால், அதற்கடுத்து நெல்சன் இயக்கத்தில் ரஜினியும், கமலும் இணைந்து நடிப்பதாக சொல்லப்படும் ரஜினியின் 174வது படத்திற்கு ரஜினிக்கு எவ்வளவு சம்பளத் தெரியுமா என கடந்த சில நாட்களாக ஒரு தகவல் பரவி வருகிறது.

விஜய்யின் கடைசி படமான 'ஜனநாயகன்' படத்தில் அவருடைய சம்பளம் 200 கோடி என்றார்கள். இப்போது ரஜினியின் 174வது படத்திற்காக அவர் வாங்கப் போகும் சம்பளம் 220 கோடி என்று சொல்கிறார்கள். அவருடைய சம்பளம் பிளஸ் கமல்ஹாசன் சம்பளம், இதர நடிகர்கள் சம்பளம், பட தயாரிப்பு செலவு என 600 கோடியை படத்தின் பட்ஜெட் கடக்க வாய்ப்புள்ளது.

இரண்டு டாப் நடிகர்கள் பல வருடங்களுக்குப் பிறகு இணைந்து நடிக்கும் படம் என்பதால் அதிக பட்ஜெட்டாகும் என்று சொல்லப்படுகிறது. ஓடிடி, சாட்டிலைட், ஆடியோ உரிமை ஆகியவை மூலமே படத்தின் பாதி பட்ஜெட்டிற்கு மேல் வசூலித்து விடலாம் என்கிறார்கள்.