அஞ்சு ரூபாய் டாக்டர் போன்ற கதாபாத்திரத்தில் நடிக்கும் மம்முட்டி

மலையாள திரையுலகில் மூத்த எழுத்தாளரும் இயக்குனருமான அடூர் கோபாலகிருஷ்ணன் தற்போது தனது 86வது வயதில் மம்முட்டி நடிக்கும் 'படயாத்ரா' என்கிற படத்தை இயக்கி வருகிறார். கேரளாவில் பல்வேறு இடங்களில் இதன் படப்பிடிப்பு நடைபெற்று வருகிறது. இந்த படத்தில் மம்முட்டி டாக்டர் கதாபாத்திரத்தில் நடிக்கிறார். அதாவது நகரங்களில் தனியார் மருத்துவமனைகளில் அவருக்கான டிமாண்ட் அதிகம் இருந்தும் கூட அதையெல்லாம் ஒதுக்கி தள்ளிவிட்டு பழங்குடியினர் வசிக்கும் பகுதிக்குச் சென்று ஒரு வீடு, அதனுடனே இணைந்த கிளினிக் என ஒரு எளிமையான மருத்துவராக இதில் நடித்திருக்கிறார்.

பல நோயாளிகளிடம் பணம் எதுவும் வாங்காமல் அருகில் ஒரு உண்டியல் வைத்து அவர்களால் முடிந்ததை அதில் போடச் சொல்கிற கதாபாத்திரம் அது. சொல்லப்போனால் தமிழ்நாட்டில் ஐந்து ரூபாய் டாக்டர் என்று பெயர் பெற்று வாழ்ந்து மறைந்த சென்னை வண்ணாரப்பேட்டை சேர்ந்த டாக்டர் ஜெயச்சந்திரன் போல மம்முட்டியின் கதாபாத்திரம் உருவாக்கப்பட்டுள்ளதாக தெரிகிறது.