கேரளா பிளஸ் 2 மாதிரி தேர்வில் மோகன்லாலின் சினிமா பயணம் குறித்து கேள்வி

சில சமயங்களில் பள்ளி அல்லது கல்லூரி தேர்வுகளில் அவ்வளவு ஏன் டிஎன்பிஎஸ்சி போன்ற தேர்வுகளில் கூட சம்பந்தமே இல்லாமல் சினிமா நடிகர்களை பற்றிய கேள்விகள் இடம்பெற்று அவ்வப்போது சர்ச்சைகள் கிளம்புவதை பார்த்திருக்கிறோம். இந்த நிலையில் கேரளாவில் பிளஸ் 2 மாதிரி வினாத்தாளில் மோகன்லாலின் திரையுலக பயணம் பற்றி விரிவாக எழுதுக என்று கேள்வி கேட்கப்பட்டுள்ளது பலரையும் ஆச்சரியப்பட வைத்துள்ளது. கேள்வித்தாளில் மோகன்லால் குறித்து அவரது அறிமுகப்படம் முதல் தற்போது நடித்து வரும் 'ஜெயிலர் 2' படம் உள்ளிட்ட சில தகவல்கள் இனைப்பாக கொடுக்கப்பட்டுள்ளன.

அந்த தகவல்களை மையப்படுத்தி மோகன்லால் பற்றி கட்டுரை எழுதும்படி மாணவர்களுக்கு கேள்வி கேட்கப்பட்டுள்ளது. இது கேள்வித்தாள் தயாரித்த யாரோ ஒரு ஆர்வக்கோளாறு நபரால் கேட்கப்பட்ட கேள்வியா என்றால் அதுதான் இல்லையாம். மாணவர்கள் பொதுத்தேர்வு எழுதும்போது அதிகம் மன அழுத்தத்திற்கு ஆளாகின்றனர். அவர்களை மன அழுத்தம் இன்றி ரிலாக்ஸ் ஆக தேர்வு எழுத வைக்கும் முயற்சியாக இது போன்ற கேள்வி சேர்க்கப்பட்டுள்ளதாக தகவல் வெளியாகியுள்ளது.