மீண்டும் ‛தி ராஜா சாப்' பட நிறுவனத்துடன் இணையும் பிரபாஸ்!

மாருதி இயக்கத்தில் பிரபாஸ் நடித்து கடந்த ஜனவரி ஒன்பதாம் தேதி திரைக்கு வந்த படம் ‛தி ராஜா சாப்'. இப்படத்தில் அவருடன் சஞ்சய் தத், நிதி அகர்வால், மாளவிகா மோகனன் உள்ளிட்ட பலர் நடித்தார்கள். ஆனால் பெரிய அளவில் எதிர்பார்க்கப்பட்ட இந்த படம் பாக்ஸ் ஆபிஸில் படுதோல்வியை சந்தித்தது. பிரபாஸ் ரசிகர்கள் மத்தியில்கூட இந்த படம் விமர்சிக்கப்பட்டது. அந்த அளவுக்கு ‛தி ராஜா சாப்' எந்தவித தாக்கத்தையும் ஏற்படுத்தவில்லை. என்றாலும் அப்படத்தை தயாரித்த பீப்பிள் மீடியா நிறுவனம் மீண்டும் பிரபாஸ் நடிப்பில் ஒரு படம் தயாரிக்க திட்டமிட்டு வருகிறது. பெரும்பாலும் ஒரு படம் தோல்வி அடைந்த பிறகு அந்த ஹீரோக்களை வைத்து படம் தயாரிப்பதில் நிறுவனங்கள் ஆர்வம் காட்டுவதில்லை. ஆனால் இந்த நிறுவனம் மீண்டும் தங்களது அடுத்த படத்திற்கும் பிரபாஸை ஒப்பந்தம் செய்திருக்கிறது. அதையடுத்து சில முக்கிய இயக்குனர்களிடத்தில் கதை கேட்டு வருகிறார்கள். மேலும், தி ராஜா சாப் படத்தை அடுத்து தற்போது ‛பவுஸி, ஸ்பிரிட்' போன்ற படங்களில் நடித்து வருகிறார் பிரபாஸ்.