ஆங்கிலோ இந்திய பெண்ணாக நடிக்கும் ப்ரீத்தி முகுந்தன்

கவின் ஜோடியாக 'ஸ்டார்' படத்தில் அறிமுகமானவர் ப்ரீத்தி முகுந்தன். அதன்பிறகு 'கண்ணப்பா' தெலுங்கு படத்தில் நிமிலியாக நடித்தார். சமீபத்தில் வெளியாகி பெரிய வெற்ற பெற்ற 'சர்வம் மாயா' படத்தில் நிவின் பாலி காதலி, சாதியாவாக நடித்தார். தமிழில் 'இதயம் முரளி' படத்திலும் நடித்து வருகிறார்.

இந்த நிலையில் அவர் ஹரிஷ் கல்யாண் ஜோடியாக 'தாஷமக்கான்' படத்தில் நடித்து வருகிறார். இதில் பாப் இசை கலைஞனான ஹரிஷை காதலித்து, அவரது வளர்ச்சிக்கு உதவும் பெரம்பூர் பகுதியை சேர்ந்த ஆங்கிலோ இந்திய பெண்ணாக நடிக்கிறார். படத்தை 'லிப்ட்' படத்தை இயக்கிய வினீத் பிரசாத் இயக்குகிறார்.

படம் குறித்து வினீத் பிரசாத் கூறும்போது “வடசென்னை மக்களை வன்முறையாளர்களாவே சினிமா சித்திரிக்கிறது. ஆனால் உண்மையில் அவர்கள் அன்பானவர்கள், சென்னையின் பூர்வகுடி மக்கள், அவர்களுக்கென்னு தனி உச்சரிப்பு, கலாசாரம் இருக்கிறது. அவர்களின் தனித்த இசைதான் பாப். அந்த பகுதியில் இருந்து பாப் உலகில் சாதிக்கத் துடிக்கும் ஒரு இளைஞனின் கதைதான் இது.

இதற்காக ஹரிஷ், 2 மாதங்கள் வரை பாப் இசை குழுவில் இணைந்து பணியாற்றி தன்னை தயார் செய்து கொண்டு அர்ப்பணிப்புடன் நடித்திருக்கிறார். படத்தில் ப்ரீத்தி முகுந்தனின் இடமும் கணிசமாக இருக்கிறது. பெரம்பூர் பகுதியில் குடியிருக்கும் ஆங்கிலோ - இந்தியப் பெண்ணாக வருகிறார். கதையின் எல்லா தன்மைகளையும் புரிந்துகொண்டு நடித்தார். ப்ரீத்தி முகுந்தன் இன்றைக்கு கேரளா வரைக்கும் எல்லோருக்கும் ரொம்பப் பிடித்த ஹீரோயினாக இருக்கிறார். ஹரிஷ் கல்யாணையும், ப்ரீத்தி முகுந்தனையும் மத்திய சென்னை பையனாகவும், பெண்ணாகவும்தான் படத்தில் பார்க்கலாம்” என்கிறார்.