நடிகர்களை போன்று நடிகைகளையும் மதியுங்கள் : அனுஷ்கா கோபம்

பாகுபலி 2 படத்திற்கு அதிக படங்களில் நடிக்காவிட்டாலும் அவ்வப்போது தேர்ந்தெடுத்த, நாயகியை மையமாக வைத்து உருவாகும் படங்களில் நடித்து வருகிறார் அனுஷ்கா. பாகுபலி 2 படத்தில் நடித்து வந்தபோது பிரபாசும், அனுஷ்காவும் காதலிப்பதாக செய்திகள் வெளியாகி பரபரப்பை ஏற்படுத்தியது. ஆனால் பின்னர் அவர்கள் இருவருமே அதை மறுத்தார்கள். அதன்பிறகு இப்போது வரை பிரபாஸை போலவே அனுஷ்காவும் திருமணம் செய்து கொள்ளாமல் சிங்கிளாக வாழ்ந்து வருகிறார். இதன் காரணமாக அவரைப்பற்றி திருமண வதந்திகள் அவ்வப்போது வெளியாகி வருகின்றன.

இந்த நிலையில் தற்போது 44 வயதாகும் அனுஷ்கா ஒரு தொழிலதிபரை விரைவில் திருமணம் செய்து கொள்ள இருப்பதாக டோலிவுட்டில் ஒரு செய்தி வெளியாகியுள்ளது. ஆனால் இந்த செய்தியை பார்த்து உடனடியாக அதற்கு தனது ரியாக்சனை வெளிப்படுத்தி உள்ளார் அனுஷ்கா. அவர் வெளியிட்டுள்ள செய்தியில், எனது திருமணம் குறித்த வதந்திகளை வெளியிடும் ஒவ்வொரு நேரமும் என்னுடைய வயது 44 என்பதை மீடியாக்கள் சுட்டிக் காட்டுகின்றன. ஆனால் இதே வயதில் எத்தனையோ ஹீரோக்கள் திருமணம் செய்து கொள்ளாமல் இருந்தபோதும் அவர்களின் வயதை யாரும் சுட்டிக்காட்டுவதில்லை. ஆனால் நடிகைகள் விஷயத்தில் மட்டும் இப்படி வயதை சொல்லி அதை பெரிதாக்குகிறார்கள். அந்த வகையில் மீடியாக்கள் நடிகர்களுக்கு கொடுக்கும் மரியாதையை நடிகைகளுக்கு கொடுப்பதில்லை என்று தனது கோபத்தை வெளிப்படுத்தி இருக்கிறார் அனுஷ்கா.