‛ஜனநாயகன்' ரிலீஸ் எப்போது : தவியாய் தவிக்கும் சின்ன படங்கள்

தமிழக முதல்வர் விஜய் நடித்த ஜனநாயகன் இந்த மாதம் வெளியாகும் என்று எதிர்பார்க்கப்படுகிறது. ஆனாலும் எந்த தேதியில் வெளியாகும் என உறுதியாக தெரியவில்லை. ஜூலை 17, 24 அல்லது 31ல் ரிலீஸ் ஆக அதிக வாய்ப்பு என்று கூறப்படுகிறது. ஜனநாயகன் ரிலீஸ் ஆனால் அந்த தேதியில் நம் படத்தை விட வேண்டாம் என பல நிறுவனங்கள் நினைக்கின்றன. நம் படத்துக்கு தியேட்டர் கிடைக்காது என்று நம்புகிறார்கள். அதனால், ஜனநாயகன் வந்தபின் அல்லது அதற்கு 2 வாரத்துக்கு முன் வரலாம் என நினைக்கிறார்கள்.

ஆனால், ஜனநாயகன் ரிலீஸ் தேதி உறுதியாக தெரியாத நிலையில் பலர் தவிக்கிறார்கள். குறிப்பாக 10க்கும் அதிகமான படங்கள் இந்த சிக்கலில் மாட்டி இருக்கிறதாம். இந்த வாரம் லவ் ஓ லவ், இதயம் முரளி, லட்சுமிகாந்தன் கொலை வழக்கு, முதற்கனல் உள்ளிட்ட படங்களும், அடுத்த வாரம் ஜூலை 17 அர்ஜூன் பெயர் பத்து, ஓ சுகுமாரி, அன்பே டயானா, அருள்வான், தி டார்க் ஹெவன், பிளாக் கோஸ்ட், பகவான் படங்களும், ஜூலை 23ல் இம்மார்ட்டல், தி இந்தியா ஸ்டோரி படங்களும் வர உள்ளன. ஜனநாயகன் வந்தால் இந்த படங்களில் சில பின்வாங்கும் என தெரிகிறது. அடுத்த மாதம் சூர்யா நடித்த விஸ்வநாத் அண்ட் சன்ஸ், டாக்சிக், டிரைன், மகுடம் படங்கள் வருவதால் சின்ன படங்களுக்கு தியேட்டர் கிடைக்காத சூழல் ஏற்படும்.