விஜய் சேதுபதிக்கு ஜோடியாகும் டிவி நடிகைகள் : அடித்தது ஜாக்பாட்
வெள்ளித்திரையிலிருந்து சின்னத்திரைக்கு வந்த காலம் போய் சின்னத்திரை நடிகைகள் வெள்ளித்திரையில் பெரிய இடங்களை பிடித்து வருகின்றனர். அந்த வரிசையில் சமீபத்தில் பிக்பாஸ் ஷிவானி விஜய் சேதுபதியுடன் இணைந்து நடிக்கவுள்ள தகவல் சமீபத்தில் வெளியானது. இந்நிலையில் மேலும் இரண்டு தொலைக்காட்சி நடிகைகள் விஜய் சேதுபதியுடன் ஜோடி சேர உள்ளனர்.
லோகேஷ் கனகராஜ் இயக்கத்தில் கமல்ஹாசன் நடிக்கும் விக்ரம் திரைப்படம் பெரிய எதிர்பார்ப்பை ஏற்படுத்தி வருகிறது. இந்தபடத்தில் விஜய் சேதுபதி வில்லனாக நடிக்கும் செய்தி அனைவருக்கும் தெரிந்ததே. ஆனால், விஜய் சேதுபதிக்கு இந்த படத்தின் கதைப்படி மூன்று மனைவிகள் உள்ளனராம். அதற்கு நாயகிகளை தேடி வந்த படக்குழுவினர் சின்னத்திரை நடிகைகளை மொத்தமாக களமிறக்கியுள்ளனர்.
விஜய் சேதுபதிக்கு ஜோடியாக ஷிவானி நடிக்கவுள்ள தகவல் ஏற்கனவே அறிவிக்கப்பட்ட நிலையில், தற்போது மைனா நந்தினியும் விஜய் சேதுபதியின் மற்றொரு ஜோடியாக நடிக்கவுள்ளார். இதை மைனா நந்தினி தனது இன்ஸ்டாகிராமில் இயக்குனர் லோகேஷுடன் எடுத்த புகைப்படத்தை வெளியிட்டு தெரிவித்துள்ளார். மேலும் மூன்றாவது ஜோடியாக விஜே மகேஸ்வரி நடிக்கிறார்.