வரதராஜ பெருமாள் கோவில் கும்பாபிஷேகம்

காஞ்சிபுரம்: காஞ்சிபுரம் வரதராஜப் பெருமாள் கோவில் கும்பாபிஷேகம், அடுத்த மாதம் 5ம் தேதி நடைபெற உள்ளதையொட்டி, கோவிலில் யாகசாலை அமைக்கும் பணி நேற்று துவங்கியது.காஞ்சிபுரம் வரதராஜப் பெருமாள் கோவில் திருப்பணி 5 கோடி ரூபாய் மதிப்பில் முடிந்துள்ளது. கிழக்கு ராஜகோபுரம், மேற்கு ராஜகோபுரம், தொண்டரடிப்பொடி பிரகாரம், சக்கரத்தாழ்வார் சன்னிதி, ஆகியவை புதுப்பிக்கப்பட்டுள்ளன. தாயார் விமானத்திற்கு, 2 கோடி ரூபாய் மதிப்பில், தங்க தகடுகள் வேயப்பட்டுள்ளது. மூலவர் சன்னிதி புதுப்பிக்கப்பட உள்ளது.கோவில் கும்பாபிஷேகம் அடுத்த மாதம் 5ம் தேதி நடைபெறுகிறது. இதற்கான யாகசாலை அமைப்பதற்காக, நேற்று காலை 9 மணிக்கு, மேளதாளங்கள் ஒலிக்க, வேதங்கள் ஓத, பந்தல்கால் நடப்பட்டது. கோவில் உதவி ஆணையர் தியாகராஜன் கூறும்போது,""நூறு ஆண்டுகளுக்கு பிறகு, அனைத்து விமானங்களுக்கும், கோபுரங்களுக்கும், ஒரே நேரத்தில் கும்பாபிஷேகம் நடைபெற உள்ளது. யாகசாலை பூஜைகள், அடுத்த மாதம் முதல் தேதி துவங்க உள்ளது, என்றார்.