பொன்பத்தி சக்திவேல் முருகன் கோவில் நாளை கும்பாபிஷேகம்

செஞ்சி: பொன்பத்தி சக்திவேல் முருகன் கோவில் மகா கும்பாபிஷேகம் நாளை நடைபெறுகிறது. செஞ்சி அடுத்த பொன்பத்தி கிராமத்தில் அமைந்திருக்கும் விநாயகர், சக்திவேல் முருகன், நவக்கிரகங்கள், மகாவிஷ்ணு, தட்சிணாமூர்த்தி, பெருமாள், துர்க்கை, இடும்பன் மற்றும் கொடிமரத்திற்கு திருப்பணிகள் செய்து ஜீர்னோத்தாரண அஷ்டபந்தன மகா கும்பாபிஷேகம் நாளை (13ம் தேதி) நடைபெறுகிறது. இதை முன்னிட்டு நேற்று இரவு 9 மணிக்கு கணபதி பூஜை, வாஸ்து சாந்தி, வாஸ்து ஹோமம், பிரவேசபலி ஆகியன நடந்தது. இன்று காலை 10.30 மணிக்கு கணபதி பூஜை, கோ பூஜை, நவகிரக ஹோமம் ஆகியனவும், மாலை 4.30 மணிக்கு ரக்ஷா பந்தனம், யாக சாலை பிரவேசம், முதல் கால யாக பூஜை, அஷ்டபந்தனம் சாத்துதல் ஆகியன நடக்க உள்ளது. நாளை காலை 6 மணிக்கு இரண்டாம் கால யாக சாலை பூஜையும், நாடி சந்தானம், மகா பூர்ணாஹுதி, யாத்ரா தானம், கலசம் புறப்படும், 7:30 மணிக்கு கோவில் விமான கும்பாபிஷேகமும், 7 45 மணிக்கு மூலவர் கும்பாபிஷேகமும் நடக்க உள்ளது. விழா ஏற்பாடுகளை பொன்பத்தி கிராம பொதுமக்கள் செய்து வருகின்றனர்.