சிறுமுகை மகா சக்தி மாரியம்மன் கோவில் திருவிழா கோலாகலம்

மேட்டுப்பாளையம்; சிறுமுகையில் மகாசக்தி மாரியம்மன் கோவிலில், மாரியம்மன் திருவிழா நடைபெற்று வருகிறது.

சிறுமுகை சக்தி மெயின் சாலையில், சக்தி விநாயகர் மற்றும் மகா சக்தி மாரியம்மன் கோவில் உள்ளது. இக்கோவிலின், 24ம் ஆண்டு மாரியம்மன் திருவிழா, கடந்த மாதம், 28ம் தேதி துவங்கியது. 29ம் தேதி பவானி ஆற்றில் ராமர் கோவில் படித்துறையில் இருந்து, தீர்த்தங்கள் எடுத்து வந்து, விநாயகர், அம்மன், பாலமுருகன் மற்றும் நவகிரகங்களுக்கு தீர்த்த அபிஷேகம் செய்யப்பட்டது. 30ம் தேதி மகா கணபதி ஹோமமும், அதைத் தொடர்ந்து பவானி ஆற்றிலிருந்து கோவிலுக்கு கம்பம் எடுத்து வரப்பட்டது. இரவு பூச்சாட்டும், அதைத் தொடர்ந்து கம்பமும் நடப்பட்டது. விழாவை முன்னிட்டு, வருகிற ஏழாம் தேதி வரை, தினமும் அம்மனுக்கு அபிஷேகம் மற்றும் அலங்கார பூஜையும் நடைபெற உள்ளது. அன்று இரவு அம்மன் அழைப்பும், பவானி ஆற்றில் இருந்து சக்தி கரகம் எடுத்து வருதலும் நடைபெற உள்ளது. 8ம் தேதி காலை பவானி ஆற்றில், ராமர் கோவில் படித்துறையில் இருந்து, அம்மன் சக்தி கலசங்களும், படைக்களமும் அழைத்து வரப்படுகிறது. காலை, 8 மணிக்கு கல்யாண சீர்வரிசை அழைப்பும், அதை தொடர்ந்து, 10:30 மணிக்கு அம்மன் திருக்கல்யாண வைபவமும் நடைபெற உள்ளது. அன்று மதியம் மாவிளக்கு பூஜையும் நடைபெற உள்ளது. ஒன்பதாம் தேதி மஞ்சள் நீராட்டும், மறுபூஜையும் நடைபெற உள்ளது. தினமும் மதியம் பக்தர்களுக்கு அன்னதானம் வழங்கப்பட்டு வருகிறது. விழா ஏற்பாடுகளை கோவில் நிர்வாகத்தினர் மற்றும் ஊர் பொதுமக்கள் செய்து வருகின்றனர்.