புதிய இந்தியா யாருக்கும் தலைவணங்காது மக்களை காக்கவும் தயங்காது: பிரதமர் மோடி

உடுப்பி: “பயங்கரவாத தாக்குதல்களின் போது, முந்தைய அரசுகள் மவுனம் காத்தன. ஆனால், இந்த முறை புதிய இந்தியா யாருக்கும் தலைவணங்காது. குடிமக்களை பாதுகாக்கவும் தயங்காது,” என, பிரதமர் நரேந்திர மோடி தெரிவித்துள்ளார்.

கர்நாடகாவின் உடுப்பியில் உள்ள புகழ்பெற்ற ஸ்ரீ கிருஷ்ணர் மடத்துக்கு பிரதமர் நரேந்திர மோடி வருகை தந்தார். முன்னதாக, உடுப்பி டவுனில் உள்ள நாராயணகுரு சதுக்கத்தில் இருந்து கல்சங்கா சந்திப்பு வரை, பிரதமர் சாலை பேரணி நடத்தினார்.  

திருப்தி அளிக்கிறது; அப்போது, சாலையின் இருபுறமும் திரண்டிருந்த பொதுமக்கள் மற்றும் பா.ஜ., தொண்டர்கள் அவருக்கு உற்சாக வரவேற்பு அளித்தனர். பின், கிருஷ்ணர் மடத்துக்கு சென்ற பிரதமருக்கு, நிர்வாகம் சார்பில் பூரணகும்ப மரியாதை அளிக்கப்பட்டது. மடத்தின் உள்ளே அமைந்துள்ள கிருஷ்ணர் கோவிலின் தங்க கதவை திறந்து உள்ளே சென்ற அவர், தீர்த்த அபிஷேகம் செய்து வழிபட்டார். ஸ்ரீபுட்டிகே மடத்தின் தலைவர் ஸ்ரீசுகுணேந்திர தீர்த்த சுவாமியை சந்தித்து ஆசி பெற்றார். இதையடுத்து, ஹிந்துக்களின் புனித நுாலான பகவத் கீதையை, 1 லட்சம் பேர் பாராயணம் செய்த நிகழ்வில் மோடி பங்கேற்றார். 

அப்போது அவர் கூறியதாவது: பகவான் ஸ்ரீகிருஷ்ணர் மற்றும் ஜகத்குரு ஸ்ரீமத்வாச்சாரியார் ஆகியோரின் ஆசீர்வதிக்கப்பட்ட பூமிக்கு வருவது எனக்கு திருப்தி அளிக்கிறது. இந்த சந்தர்ப்பத்தில் லட்சம் பேர் ஒன்றாக அமர்ந்து பகவத் கீதையின் ஸ்லோகங்களை உச்சரித்தபோது, உலகெங்கிலும் உள்ள மக்கள் இந்தியாவின் ஆன்மிக பாரம்பரியத்தை கண்டனர். பொது நலனுக்காக பாடுபடுமாறு கீதையில் பகவான் கிருஷ்ணர் நமக்கு சொல்கிறார். ஏழைகளுக்கு உதவ வேண்டும் என்ற பகவத் கீதையின் செய்தியே, மக்களுக்கு வழங்கப்படும் பல்வேறு திட்டங்களின் அடிப்படை. அமைதி மற்றும் உண்மைக்காக பாடுபடவும், அராஜகம் செய்பவர்களை அழிக்க வேண்டியதன் அவசியத்தையும் பகவத் கீதை நமக்கு கற்பிக்கிறது. கீதையின் வார்த்தைகள், தனிநபர்களை மட்டுமல்ல நாட்டின் கொள்கைகளையும் வடிவமைக்கின்றன. நாங்கள், உலகமே ஒரு குடும்பம் என்பதில் நம்பிக்கை வைத்துள்ளோம். 

சுதர்சன சக்கரம்: ஜம்மு - காஷ்மீர் பஹல்காமில் கடந்த ஏப்ரலில் நடந்த பயங்கரவாத தாக்குதலில் கர்நாடகாவை சேர்ந்தவர்கள் உட்பட 26 பேர் பலியாகினர். ஏற்கனவே நடந்த பயங்கரவாத தாக்குதல்களின் போது, முந்தைய அரசுகள் மவுனம் காத்தன. ஆனால், இந்த முறை புதிய இந்தியா யாருக்கும் தலைவணங்கவில்லை. அதேசமயம் தன் குடிமக்களை பாதுகாக்கவும் தயங்கவில்லை. தெய்வீக ஞானம் மற்றும் ஆன்மிக ஆற்றல் பெற்ற சுதர்சன சக்கரம் போல் இருந்த நம் விமானப்படையின் எஸ் - 400 வான் பாதுகாப்பு கவசம், அண்டை நாடான பாகிஸ்தானின் தாக்குதல்களில் இருந்து நம்மை காத்தன. தொடர்ந்து அத்துமீறலில் ஈடுபட்டு ஆக்கிரமிக்க நினைக்கும் எதிரிகளை, இந்த சுதர்சன சக்கரம் அழிக்கும். இவ்வாறு அவர் பேசினார். தொடர்ந்து, கிருஷ்ணர் சன்னிதிக்கு முன்னால் உள்ள சுவர்ண தீர்த்த மண்டபத்தை பிரதமர் மோடி திறந்து வைத்தார்.