சனாதன தர்மம் அறிய பகவத் கீதை படியுங்கள் சிருங்கேரி ஜகத்குரு அருளுரை
ADDED :2 minutes ago
டில்லியில், விஜய யாத்திரை மேற்கொண்டுள்ள சிருங்கேரி ஸ்ரீ சாரதா பீட ஜகத்குரு ஸ்ரீ விதுசேகர பாரதீ சுவாமிகள், கடந்த 27ம் தேதி குர்கானில் புதிதாக ஏற்படுத்தப்பட்டுள்ள சிருங்கேரி ஸ்ரீ சாரதா பீடத்தின் கிளை திருமட வளாகத்தில் உள்ள மஹா கணபதி, சிவலிங்கம், சந்திரமவுலீஸ்வரர், சாரதாம்பாள், ஆதி சங்கரர், வெங்கடாஜலபதி, ஆஞ்சநேயர் மற்றும் நவக்கிரகங்கள் ஆகிய சன்னிதிகளுக்கு கும்பாபிஷேகம் செய்வித்தார்.
பக்தர்கள் மத்தியில், ஜகத்குரு ஆற்றிய அருளுரை:
அனுஷ்டானம், ஒருவர் தினமும் செய்ய வேண்டிய ஆன்மிக நெறிமுறை; அது ஆன்மிக சாதனையின் அடிப்படை. அது என்ன வகை அனுஷ்டானம் எனில், துவக்கத்தில் மனதை துாய்மைப்படுத்தும் சக்தி கொண்ட இறைவனின் புகழ்பெற்ற நாமங்களை உச்சரிப்பதாகும். இது வெறும் நாமம் உச்சரிப்பதைப் போலத் தோன்றலாம். ஆனால், ஒருவரை ஜப யாகத்தின் உச்ச நிலைக்கு இட்டுச் செல்லும்.
அறிவை பலப்படுத்துகிறது இறைவனின் நாமத்தை உச்சரிக்கும் இந்த அனுஷ்டானத்தை ஒரு ரூபத்தின் மீது கவனம் செலுத்தி செய்ய வேண்டும். பவுதிக நாமங்களையும் வடிவங்களையும் விடுத்து, தெய்வீக நாமம் மற்றும் தெய்வீக ரூபம் கவனச்சிதறல் உள்ள மனதை ஒருமுகப்படுத்துகிறது. அனுஷ்டானப் பயிற்சிக்கு பின், அத்யயனம் எனப்படும், சாஸ்த்ர தெய்வீக நுால்களைப் படித்தல் முறை பின்பற்றப்பட வேண்டும்.
ஏனெனில், தெய்வீக நாமம் மற்றும் ரூபம் ஒருமுகப்பட்ட மனதுக்கு வழிவகுக்கும்போது, சாஸ்திர நுால்களைப் படித்தல் அறிவை பலப்படுத்துகிறது. சனாதன தர்மத்தின் சாராம்சத்தைப் புரிந்துகொள்ள பகவத் கீதையைப் படிக்க வேண்டும். ஆன்மிக ரீதியில் பயிற்சி பெற்ற அறிவானது விவேகத்தின் சக்தியைப் பயன்படுத்தி மனதைக் கட்டுப்படுத்தும் திறனை பெறுகிறது. அதன் பயனாக, ஒரு துாய்மையான மற்றும் ஒருமுகப்பட்ட மனம் புலன்களை கட்டுப்படுத்தும் திறனைப் பெறுகிறது.
பல்வேறு வடிவங்களைப் பார்க்கும் கண்கள், பல்வேறு ஒலிகளைக் கேட்கும் காதுகள், இனிமையான வாசனையை நுகரும் மூக்கு, சிறந்த உணவைச் சுவைக்கும் நாக்கு மற்றும் மனித தொடர்பை உணரும் தோல் ஆகியவையே மனதை வெளிப்புறமாக அலைபாய அனுமதிக்கும் இந்தப் புலன்கள். மனம் வெறுமனே அலைந்து திரிந்து, உள்நோக்கித் திரும்ப மறுக்கிறது. ஆனால், சாதனை என்பது இந்த முழு செயல்முறையையும் தலைகீழாக மாற்றக்கூடிய மார்க்கம் ஆகும்.
இவ்வாறு, அவர் அருளுரை நிகழ்த்தினார்.
குர்கான், செக்டார்- - 42-ல் உள்ள கிளை மடத்துக்கு விஜயம் செய்த ஸ்ரீ சுவாமிகளுக்கு, ஸ்ரீ மடத்தின் தலைமை நிர்வாக அதிகாரி குரு சேவா நிரத ஸ்ரீ பி.ஏ.முரளி பூர்ண கும்ப மரியாதையை வழங்கினார்.
இக்கிளை மடம் உருவாவதற்கு முக்கிய பங்கு வகித்த ஸ்ரீ ராதாகிருஷ்ணன், ஆச்சார்யாரை வரவேற்றார்.
இங்கு பிரதிஷ்டை செய்யப்பட்ட ஆதி சங்கராச்சாரியாரின் திருவுருவச் சிலையை, சிருங்கேரியில் ஜகத்குரு ஸ்ரீ பாரதீ தீர்த்த மஹா சன்னிதானம், தமது திருக்கரங்களால் பூஜை செய்து அனுக்ரஹித்துள்ளார்.
ஸ்ரீஆச்சார்யார் துல்லியம் வெங்கடாஜலபதி விக்ரஹம் திருப்பதியில் உள்ள பாலாஜியின் வடிவிலேயே சற்று சிறியதாக அமைந்துள்ள வடிவம்.
ஸ்ரீ ஆச்சார்யார் அந்த விக்கிரஹத்திற்கு ஸ்ரீசூர்ணத்தை அணிவித்த போது எவ்வாறு திருப்பதியில் பாலாஜிக்கு பச்சை கற்பூரத்துடன் கீழ் தாடையிலும் அணிவிக்கப்படுமோ, அதேபோல, ஆச்சார்யார் சந்தனக் குழம்பைப் பயன்படுத்தி, சிறிய வடிவில் துல்லியத்துடன் அவ்வாறே செய்தார்.
வேத பாடசாலை மாணவர்கள் ஹனுமான் சாலிசாவை பாராயணம் செய்தனர். மாலையில் ஸ்ரீ சுவாமிகள் கோசாலைக்கும், ஷீதளா மாதா மந்திருக்கும் விஜயம் செய்தார்.