திருத்தணி கோவிலில் திரண்ட பக்தர்கள் இரண்டு மணி நேரம் காத்திருந்து தரிசனம்

 திருத்தணி: திருத்தணி முருகன் கோவிலில், வார விடுமுறையான நேற்று, ஆயிரக்கணக்கில் திரண்ட பக்தர்கள், இரண்டு மணி நேரம் காத்திருந்து மூலவரை தரிசித்தனர்.

திருத்தணி முருகன் கோவிலுக்கு, தமிழகம் உட்பட பல்வேறு மாநிலங்களில் இருந்து, தினமும் ஆயிரக்கணக்கான பக்தர்கள் வந்து, மூலவரை தரிசித்து செல்கின்றனர். இந்நிலையில், நேற்று வார விடுமுறையான ஞாயிற்றுக்கிழமை என்பதால், வழக்கத்திற்கு மாறாக, மலைக்கோவிலில் அதிகாலை 5:00 மணி முதல் பல்லாயிரக்கணக்கான பக்தர்கள் திரண்டனர். இதனால், பொது வழியில் பக்தர்கள், இரண்டு மணி நேரம் நீண்ட வரிசையில் காத்திருந்து, மூலவரை தரிசனம் செய்தனர். அதே போல், 100 ரூபாய் சிறப்பு தரிசன டிக்கெட் பெற்ற பக்தர்கள், ஒன்றரை மணி நேரம் காத்திருந்து மூலவரை வழிபட்டனர். திருத்தணி கூடுதல் எஸ்.பி., ஷுபம் திமான் தலைமையில், 50க்கும் மேற்பட்ட போலீசார் பாதுகாப்பு பணியில் ஈடுபட்டனர். மேலும், மலைப்பாதையில் ஏற்பட்ட போக்குவரத்து நெரிசலை, போலீசார் போராடி சீரமைத்தனர். மலைப்பாதையில் ஆட்டோக்கள் செல்வதற்கு தடை விதிக்கப்பட்டதால், பக்தர்கள் நலன் கருதி, கோவில் நிர்வாகம் சார்பில், 10 பேருந்துகள் மலைக்கோவிலுக்கு இயக்கப்பட்டன. முன்னதாக, நேற்று அதிகாலை 5:00 மணிக்கு, மூலவருக்கு சிறப்பு அபிஷேகம், தங்க வேல், தங்க கிரீடம் மற்றும் வைர ஆபரணங்கள் அணிவித்து, சிறப்பு தீபாராதனை நடந்தது. இரவு 7:00 மணிக்கு, வள்ளி – தெய்வானையுடன் தங்கத்தேரில் எழுந்தருளிய உற்சவர் முருகன், தேர் வீதியில் ஒரு முறை வலம் வந்து பக்தர்களுக்கு அருள்பாலித்தார்.