தண்டு மாரியம்மன் கோவிலில் பூச்சாட்டு விழா; சிறப்பு அலங்காரத்தில் அம்மன் தரிசனம்

அன்னூர்: குமாரபாளையம், தண்டு மாரியம்மன் கோவில் பூச்சாட்டு திருவிழா இன்று நடந்தது.

குமாரபாளையம், தண்டு மாரியம்மன் கோவில் பூச்சாட்டு திருவிழா கடந்த மாதம் 22ம் தேதி துவங்கியது. தினமும் மாலையில் அம்மனுக்கு சிறப்பு வழிபாடு நடந்தது. நேற்று (6ம் தேதி) இரவு பக்தர்கள் சக்தி கரகம் எடுத்து வந்தனர். அச்சம்பாளையம் ஸ்ரீ செல்வ விநாயகர் குழுவின் பஜனை நடந்தது. நடனத்துடன் பக்தி பாடல்கள் பாடப்பட்டன. ஜமாப் இசை இசைக்கப்பட்டது. இன்று (7ம் தேதி) காலை 6:00 மணிக்கு கோவில் வளாகத்தில், நூற்றுக்கும் மேற்பட்டோர் பொங்கல் வைத்து வழிபட்டனர். காலை 10:00 மணிக்கு, பக்தர்கள் ஊர்வலமாக மாவிளக்கு எடுத்து வந்தனர். மதியம் அம்மனுக்கு பல்வேறு திரவியங்களால் அபிஷேகம் நடந்தது. அலங்கார பூஜை நடந்தது. மதியம் பக்தர்கள் அலகு குத்தி தேர் இழுத்தனர். சுற்று வட்டாரத்தைச் சேர்ந்த திரளான பக்தர்கள் பங்கேற்றனர். நாளை (8ம் தேதி) காலை 11:00 மணிக்கு மறு பூஜை நடைபெறுகிறது.