உள்ளூர் செய்திகள்

/ கோயில்கள் செய்திகள் / பத்து நாள் நவராத்திரி விழா இன்று துவக்கம்!

பத்து நாள் நவராத்திரி விழா இன்று துவக்கம்!

பத்து நாள் கொண்டாடப்படும் நவராத்திரி விழா, இன்று துவங்குகிறது. விழாவை முன்னிட்டு, சென்னையில் உள்ள கோவில்கள் விழாக்கோலம் பூண்டுள்ளன. காளிகாம்பாள் கோவில்: பாரிமுனை, தம்புசெட்டித் தெருவில் உள்ள காளிகாம்பாள் கோவிலில், நவராத்திரி விழாவின் ஒவ்வொரு நாளும், சிறுமியர் மற்றும் சுமங்கலிகளை, அம்மனாக பாவித்து, அவர்களுக்கு அலங்காரம் மற்றும் பாதபூஜை நடத்தப்படும். சென்னமல்லீஸ்வரர் கோவில்: பாரிமுனை, தேவராஜ முதலி தெருவில் உள்ள, பிரமராம்பிகை சமேத சென்னமல்லீஸ்வரர் கோவிலில், தினமும் மாலை 6:00 மணிக்கு, அம்மனுக்கு சிறப்பு அபிஷேகமும் அலங்காரமும் நடத்தப்படும். அத்துடன், தினமும் வடமாநில, தாண்டியா உள்ளிட்ட நாட்டிய நிகழ்ச்சிகளும் நடத்தப்பட உள்ளன.

ஏகாம்பரேஸ்வரர் கோவில்
: தங்கசாலையில் உள்ள காமாட்சிஅம்மன் சமேத ஏகாம்பரேஸ்வரர் கோவிலில், உற்சவர் அம்மன் சிறப்பு அலங்காரத்தில் கொலு மண்டபத்தில் எழுந்தருளுவார். அத்துடன் கொலுவும் அமைக்கப்பட்டு, சிறப்பு பூஜைகள் நடத்தப்பட உள்ளன. மல்லிகேஸ்வரர் கோவில்: மண்ணடி, மரகதாம்பாள் சமேத மல்லிகேஸ்வரர் கோவிலில், நவராத்திரி பிரம்மோற்சவம் இன்று காலை 9:00 மணிக்கு கொடிஏற்றத்துடன் துவங்குகிறது. பத்து நாட்கள் நடைபெறும் விழாவில், உற்சவர் மரகதாம்பாள் தினமும், கவுரி, லட்சுமி, அன்னபூரணி உள்ளிட்ட அலங்காரத்தில் கொலு மண்டபத்தில் எழுந்தருளுவார். அத்துடன் இரவு, 7:00 மணியளவில், கொலு மண்டபத்தில் பள்ளி மாணவியரின் கலை நிகழ்ச்சிகள் நடக்க உள்ளன.

கன்யகா பரமேஸ்வரி கோவில்: கொத்தவால் சாவடியில் உள்ள கன்யகா பரமேஸ்வரி கோவிலில், நவராத்திரியை முன்னிட்டு, இன்று காலை, 6:00 மணிக்கு கலச பூஜை நடக்கிறது. நவராத்திரியின் ஒவ்வொரு நாளும், ஒவ்வொரு வாகனத்தில் அம்மன் எழுந்தருளுவார். கல்லுாரி மாணவியரின் கலை நிகழ்ச்சிகளுடன், ஒன்பதாம் நாளன்று சண்டிஹோமம், சுமங்கலி பூஜை மற்றும் குண்டப்பிரவேசம் நடக்கும். பத்தாம் நாளான விஜயதசமியன்று, இரவு, 7:00 மணிக்கு, கன்யகா பரமேஸ்வரி அம்மனின் பாரிவேட்டை நடக்க உள்ளது. இதேபோல், மயிலாப்பூர் கபாலீசுவரர், திருவான்மியூர் மருந்தீசுவரர் உள்ளிட்ட சிவாலயங்களிலும், மயிலாப்பூர் முண்டகக் கண்ணியம்மன் கோவில் உள்ளிட்ட அம்மன் கோவில்களிலும், நவராத்திரி விழா இன்று துவங்கி, 10 நாட்கள் நடக்கிறது.


தினமலர் சேனல்களுக்கு SUBSCRIBE செய்யுங்கள் !