திருப்புத்தூரில் நாளை பூமாயி அம்மன் பூச்சொரிதல்

திருப்புத்தூர் : திருப்புத்தூர் பூமாயி அம்மன் பூச்சொரிதல் விழா நாளை நடக்கிறது. வசந்தப் பெருவிழா வரும் 9ம் தேதி துவங்குகிறது. திருப்புத்தூர் பூமாயிஅம்மன் கோயிலில் சித்திரையில் பூச்சொரிதல் விழா நடைபெறும். நாளை அதிகாலை அம்மனுக்கு பூஜையுடன் விழா துவங்குகிறது.காலை 9 மணிக்கு அம்மனுக்கு சிறப்பு அபிஷேகம் நடைபெறும். பின்னர் அம்மன் ராஜ அலங்காரத்தில் அருள்பாலிப்பார். பக்தர்கள் பால்குடம், பூத்தட்டு எடுத்து பூச்சொரிந்து அம்மனை வழிபடுவர். மதியம் 2 மணிக்கு அபிஷேகத்திற்கு பின் அம்மன் சந்தனக்காப்பில் காட்சி தருவார். மறுநாள் அதிகாலை 4 மணிக்கு மேல் புஷ்ப அலங்காரம் நடந்து அம்மனுக்கு பூச்சொரிதல் நடைபெறும்.தொடர்ந்து சிறப்பு தீபாராதனை, அன்று இரவு 7 மணிக்கு அம்மனுக்கு கொடியேற்றி, காப்புக் கட்டி 10 நாள் வசந்தப் பெருவிழா துவங்கும்.அம்பாள் திருக்குளத்தை பவனி வருவார். மே 18ல் பத்தாம் திருநாளான மாலை பொங்கல்விழா ,அம்பாள் திருவீதி உலா நடைபெறும். தொடர்ந்து காப்புக் கலைந்து மஞ்சள் நீராட்டு நடைபெறும்.