இராங்கியம் கருப்பர்

அரிவாளும் கையுமாய் ஆஜானு பாகுவாய்
அங்குதான் நிற்கின்றாயா?
வரிவாள்போல் மீசையும் மணிமார்பு தோளுடன்
மனசுக்குள் நிற்கின்றாயா?
விரிவான மார்பிலே விளையாட வரட்டுமா?
விரைவாகச் சொல்க பதிலை
இறைஎங்கள் இறையே! இதயத்தின் நிறையே
இராங்கியம் கருப்பர்சாமி

கருப்பு நீ! ஆனாலும் கண்களில் சிவப்பு நீ!
கடவுளுள் நெருப்பு நீயே!
விருப்பு நீ இதயத்தின் இருப்பு நீ! மலைப்பு நீ
வியப்பு நீ! தீமையைப் பொசுக்கு நீ! உசுப்பு நீ
பூமியில் தூங்குவோரை!
கருப்பரே! எங்களின் கண்கண்ட தெய்வமே!
கருணையைக் காட்டவா நீ!

குடையும் நீ! தருவதில் கொடையும் நீ! மழையும் நீ!
குறுக்கு வழிகளுக்கே
தடையும் நீ! படையும் நீ! அருள்வெள்ள மடையும் நீ!
தாழ்வுற்ற பேர்களுக்கு
உடையும் நீ! உயிரும் நீர்! உட்பொருள் ஒளியும் நீயே!
உன்னடி தொழுதவர்க்கு
விடையும் நீ! விதையும் நீ! விளையும் நீ! முளையும் நீ
வேண்டிய தெய்வம் நீயே!